पांढरे स्वच्छ मोत्यासारखे दात असावेत, असं सगळ्यांनाच वाटतं. मात्र, त्यासाठी दातांच्या डॉक्टरांकडे जाऊन पॉलिश करण्यासारख्या महागड्या ट्रीटमेंट दरवेळी करणं शक्य नसतं. तरीही पांढऱ्या दातांसाठी डेंटिस्टकडे जाणाऱ्यांची संख्या बरीच आहे. हे पैसे वाचवण्याची इच्छा असेल, तर चांगले घरगुती उपायही आहेत. त्यावर टाकू या एक नजर…
केळीचं साल
अनेक जीवनसत्त्वं आणि खनिजांनी पुरेपूर असलेलं फळ म्हणून केळीकडे पाहिलं जातं. त्याबरोबरच त्याचं सालही खूप उपयुक्त असतं. दात पांढरे स्वच्छ करण्यासाठी याचा चांगला उपयोग होतो. हे साल दातांवर एक मिनिटभर घासल्यास दात चमकदार होतात. सालातील पोटॅशिअम, मँगनीज आणि मॅग्नेशिअम हे घटक दातांमध्ये शोषले जातात. दातांचा रंग आणि आरोग्य त्यानं चांगलं राहतं. त्यामुळे पुढच्या वेळी केळ खाल्यास त्याचं साल फेकून न देता त्याचा असा वापर करा.
स्ट्रॉबेरी
लालचुटूक स्ट्रॉबेरी हा दात पांढरे करणाऱ्या घटकांचा खूप मोठा स्रोत आहे. दात पांढरे करायचे असल्यास एक किंवा दोन स्ट्रॉबेरी पुरेशा आहेत. दोन स्ट्रॉबेरी कुस्करा आणि त्याचा गर दातांवर २-३ मिनिटांपर्यंत लावून ठेवा. नंतर चूळ भरा किंवा ब्रश करा. बघा, दात कसे पांढरे शुभ्र होतील. स्ट्रॉबेरी हा मॅलिक अॅसिडचा नैसर्गिक स्रोत आहे. त्याच्यामुळे दात पांढरे होतात, तर स्ट्रॉबेरीमध्ये असणारं फायबर नैसर्गिक क्लिन्झर म्हणून काम करतं. हे फायबर दात आणि तोंडातील जीवाणू (बॅक्टेरिया) काढून टाकण्यास मदत करते.
कच्चं गाजर
दात स्वच्छ करण्यासाठी गाजराचा चांगला उपयोग होतो. हलवा आणि कोशिंबिरीव्यतिरिक्त गाजराचा असाही वापर करून पाहा. गाजर स्वच्छ धुवून घ्या आणि कच्चीच खा. यामुळे दातांवरील पांढरा थर (प्लाक) निघून जातो. गाजर उभं कापून त्याच्या या काड्यांनी दात घासल्यास ते स्वच्छ होतात. तोंडातील जीवाणू (बॅक्टेरिया) नष्ट करून हिरडी आणि दातांचं आरोग्य चांगलं राखण्यासाठी गाजर मदत करते. मुखदुर्गंधीही कमी होते.
धूम्रपान सोडा
धूम्रपानानं कॅन्सरसारखे आजार होण्याची शक्यता तर वाढतेच, त्याव्यतिरिक्त दातांवरही लगेचच परिणाम होतो. सिगारेट ओढल्यानं दात पिवळे पडतात, तर गुटखा, पान किंवा मावा खाल्ल्यानं ते लाल होतात. कालांतरानं त्याचे दातांवर कायमस्वरूपी डाग पडतात. त्यावरून एखाद्या व्यक्तीला धूम्रपानाचं व्यसन असल्याचंही पाहताक्षणी लक्षात येतं. त्यामुळे दात पांढरे ठेवण्यासाठी धूम्रपान सोडलेलंच बरं.
स्ट्रॉचा वापर करा
अतिउष्ण किंवा अतिथंड पेये दातांसाठी अपायकारक असतात. त्यामुळे शक्यतो अशा पेयांचा वापर टाळलेलाच बरा. प्यायचीच झाल्यास स्ट्रॉचा वापर करा. त्यामुळे पेयांचा दातांशी थेट संपर्क येत नाही.