औद्योगिक वापरासाठी असलेले मिथाइल अल्कोहोल, पाणी आणि वेलची टाकून दारू म्हणून विकण्याचा पहिला प्रयोग मालवणीत करण्याचा प्रयत्न करण्यात आला होता. परंतु, हातभट्टीच्या या नव्या प्रयोगासाठी १०२ जणांना आपल्या प्राणांना मुकावे लागले असून, अद्याप ४६ जण मृत्यूशी झुंज देत आहेत. गुजरातहून आलेले हे अल्कोहोल वसई-विरारमार्गे मालाडमध्ये आले होते असे कळते. दरम्यान, मालवणीच्या घटनेनंतर पोलिसांनी शहरभरात केलेल्या कारवाईत दारूविक्रीशी संबंधति १००हून अधिक गुन्हेगारांना ताब्यात घेतले आहे.
मालाडच्या मालवणी भागातील लक्ष्मीनगर वस्तीमध्ये दारूच्या गुत्त्यांमधील दारू पिऊन आतापर्यंत १०२ जणांना जीव गमवावा लागला असून, ४६ जणांवर अजूनही शहरातील विविध हॉस्पिटलमध्ये उपचार सुरू आहेत. या दारूमध्ये नेमके काय होते, ज्यामुळे ते जीवघेणे ठरले याचा शोध पोलिस घेत असून, दारूचे काही नमूने कालिना फोरेन्सिक प्रयोगशाळेत तपासणीसाठी पाठविण्यात आले आहेत. दरम्यान, सूत्रांनी दिलेल्या माहितीनुसार, गुजरातहून मिथाइल अल्कोहोल आणि पाण्याचे मिश्रण दारू म्हणून विकण्याचा प्रयोग करण्यात आला होता. हे मिश्रण वस्तीत आल्यानंतर त्याला दारूची चव यावी म्हणून वेलची मिसळण्याचे ठरले होते. परंतु, औद्योगिक वापरासाठी वापरण्यात येणारे मिथाइल अल्कोहोलचे प्रमाण जास्त झाले आणि तेच जीवघेणे ठरले, अशी माहिती उघडकीस येत आहे. दरम्यान, गुजरातमधून नेमके कुठून हे मिश्रण आले हे तपासण्यासाठी क्राइम ब्रँचचे एक पथक गुजरातला रविवारी रात्री रवाना झाले.