‘कॅप्टन कूल’ म्हणून ओळखला जाणारा टीम इंडियाचा कर्णधार महेंद्रसिंग धोनी याला आयपीएलच्या एका सामन्यातील पंचांच्या निर्णयावर सार्वजनिक टिप्पणी केल्याबद्दल दंडाचा दणका बसला आहे. दंडापोटी धोनीच्या मानधनातून १० टक्के रक्कम कापण्याचा निर्णय सामनाधिकाऱ्यांनी घेतला आहे.
‘आयपीएल-८’च्या क्वालिफायर राउंडमधील सामन्यात धोनीच्या चेन्नई सुपर किंग्ज संघाला मंगळवारी मुंबई इंडियन्सविरोधात २५ धावांनी पराभव पत्करावा लागला. या सामन्यात चेन्नई संघाचा सलामीवीर फलंदाज ड्वेन स्मिथ याला पहिल्याच षटकात पायचित देण्यात आले होते. लसिथ मलिंगाचा एक फुलटॉस चेंडू स्मिथच्या पायावर आदळला. समोरच्या संघाकडून अपील होताच पंचांनी त्याला पायचित दिले. मात्र, रिप्लेमध्ये चेंडू लेग स्टंम्पच्या बराच बाहेर जात असल्याचे दिसत होते. चेन्नई संघाचा पराभव झाल्यामुळे पंचांचा तो निर्णय चर्चेचा विषय ठरला होता.
सामन्यानंतरच्या पुरस्कार वितरण समारंभात या निर्णयाचे पडसाद उमटले. पराभवावर प्रतिक्रिया देताना धोनीला आपल्या भावनांना आवर घालता आला नाही. त्याने स्मिथ पंचांच्या एका ‘भयंकर’ निर्णयाचा बळी ठरल्याची जाहीर प्रतिक्रिया दिली. पंचांच्या निर्णयावर जाहीर प्रतिक्रिया देणे आयपीएलच्या आचारसंहितेत बसत नसल्यामुळे सामनाधिकाऱ्यांनी धोनीच्या टिप्पणीची गंभीर दखल घेत त्याला दंड ठोठावला.