दोन महिन्यांपूर्वी ब्रिटनमध्ये झालेल्या कायदा दुरुस्तीनुसार, एखाद्या व्यक्तीच्या परवानगीशिवाय त्याचे अश्लील फोटो शेअर केल्यास २ वर्षांपर्यंत कैदेची तरतूद करण्यात आली आहे. व्यक्तींचा छळ करणे किंवा अशा प्रकाचे फोटो प्रसिद्ध करून त्यांच्याकडून खंडणी वसूल करण्याचे प्रयत्न या फोटोतून होत होते. हे फोटो काढून टाकण्यासाठी संबंधित व्यक्तीकडे पैशांची मागणी केली जात होती. हे प्रकार थांबण्यासाठी हा बदल करत असल्याचे गुगल सर्चचे वरिष्ठ उपाध्यक्ष अमित सिंघल यांनी सांगितले.
इंटरनेटवर जे काही उपलब्ध आहे ते सर्व सर्चमध्ये यावे, असे आमचे धोरण आहे. मात्र एखाद्या व्यक्तीचा बदला घेण्यासाठी टाकलेले फोटो म्हणजे त्याचे व्यक्तिगत व मानसिक पातळीवर खच्चीकरण करण्याचा प्रयत्न असून याद्वारे संबंधित व्यक्तीची मुख्यत्वे महिलांची बदनामी होत होती. त्यामुळे हा निर्णय घेतल्याचे सिंघल म्हणाले. यापुढे संबंधित व्यक्तीने त्याच्या परवानगीशिवाय टाकलेले त्याचे अश्लील फोटो काढून टाकण्याची विनंती केल्यास ते सर्च रिझल्टमधून काढून टाकले जातील. ज्यापद्धतीने बँक खाते क्रमांक, सही काढून टाकण्याची विनंती स्वीकारतो, त्याचप्रमाणे हा निर्णय असेल. यासाठी येत्या काही आठवड्यात गुगल विशेष फॉर्म सादर करणार आहे.
यामुळे ही समस्या पूर्ण सुटणार नाही केवळ यामुळे सर्च रिझल्टमधून ते फोटो जाणार आहे, मूळ वेबसाइटवरून नाही. तरीदेखील सर्च रिझल्टमध्ये जरी हे फोटो दिसले नाहीत, तरी काहीसा दिलासा मिळणार आहे.