दिल्लीतील महाराष्ट्र सदन आणि कलिना येथील राज्य मध्यवर्ती ग्रंथालयाच्या उभारणीत झालेली अनियमितता तसेच हवाला व्यवहार यामुळे भुजबळ पुरते गोत्यात आले आहेत. गेल्या दोन दिवसांपासून लाचलुचपत प्रतिबंधक विभागाच्या (एसीबी) विशेष तपास पथकाकडून भुजबळ यांच्या संपत्तीची झडती सुरू आहे. या तपासात भुजबळ यांची करोडोंची संपत्ती उजेडात आली आहे. त्याचवेळी सक्तवसुली संचालनालयानेही भुजबळ यांच्याविरोधात काल दोन नवे गुन्हे दाखल केले आहेत. या सर्व घडामोडींवर राष्ट्रवादीचे अध्यक्ष शरद पवार यांनी मौन बाळगल्याने भुजबळ यांना राष्ट्रवादीने वाऱ्यावर सोडल्याचेही बोलले जात होते. असे असतानाच आज अचानक भुजबळ पवार यांच्या निवासस्थानी पोहोचले.
पवार यांच्या भेटीनंतर भेटीबाबत अधिक बोलणं भुजबळ यांनी टाळलं. पवार यांचा मुंबई क्रिकेट असोसिएशनच्या निवडणुकीत मोठा विजय झाल्याने आपण त्यांचे अभिनंदन करण्यासाठी गेलो होतो, असे भुजबळ यांनी सांगितले.