अंधश्रद्धेच्या विळख्यातून स्त्रीला बाहेर काढणारा जादूटोणाविरोधी कायदा म्हणजे महिला मुक्तीचेच पाऊल आहे, हे जादूटोणाविरोधी कायद्यांतर्गत नुकत्याच लागलेल्या पहिल्या निकालातून अधोरेखित झाले आहे. प्रेमविवाहाला विरोध असल्याने सुनेचा करणी करून नरबळी देण्याचा कट रचणाऱ्या सासूसह एक नातेवाईक व महिला मांत्रिकाला भंडारा येथील मुख्य न्यायदंडाधिकाऱ्यांनी पाच वर्षे सक्तमजुरी व प्रत्येकी ६० हजार रु. दंडाची शिक्षा सुनावली आहे.
मूळच्या नागपूर येथील राजश्री हिचा भंडारा जिल्ह्यातील संदीप वाहने यांच्याशी प्रेमविवाह झाला. मात्र मुलाचा प्रेमविवाह न रुचलेल्या सासूने राजश्रीवर अनन्वित अत्याचार केले. तिला घराबाहेर काढण्याचे सर्व प्रयत्न थकल्यानंतर सासूने तिला बळी देण्याचा कट रचला. पण राजश्रीने मोठ्या धैर्याने हा अघोरी प्रकार हाणून पाडला. याप्रकरणी आरोपी सासू पौर्णिमा वाहने, नातेवाईक निर्मला वाहने, महिला मांत्रिक विश्वकला कांबळे यांना कोर्टाने ‘महाराष्ट्र नरबळी आणि इतर अमानुष अनिष्ट व अघोरी प्रथा आणि जादूटोणा प्रतिबंध कायदा २०१३’अन्वये शिक्षा सुनावली. ‘मांत्रिक महिलेला घरात बोलावून भीतीचे वातावरण निर्माण करणे व राजश्रीचे मनःस्वास्थ्य धोक्यात आणणे हा गुन्हा दयेस पात्र नाही. या शिक्षेने समाजामध्ये जरब निर्माण व्हावी’, असेही कोर्टाने म्हटले आहे.