नवी दिल्लीतील महाराष्ट्र सदनाच्या बांधकामाप्रकरणी घोटाळ्याचे आरोप असलेले राज्याचे माजी सार्वजनिक बांधकाममंत्री छगन भुजबळ यांना जोरदार धक्का बसला आहे. लाचलुचपत प्रतिबंधक विभागाने (एसीबी) भुजबळ यांच्या मुंबई व नाशिक येथील घरांवर व कार्यालयांवर छापे टाकले आहेत.
एसीबीच्या अधिकाऱ्यांनी नाशिकमध्ये सकाळी ९ ते ११च्या दरम्यान छापे टाकले. तेथील कार्यालयातून काही कागदपत्रं ताब्यात घेण्यात आली आहेत. दुसरीकडे मुंबईतील घर व कार्यालयांवरही छापे टाकण्यात आले आहेत. मुंबईतील छाप्यातून नेमके काय हाती आले आहे, याची माहिती अद्याप मिळू शकलेली नाही. गरज पडल्यास आणखीही छापे टाकले जाऊ शकतात, असे सूत्रांकडून समजते.
एसीबी व अमलबजावणी संचलनालयानं भुजबळ आणि त्यांच्या कुटुंबीयांविरुद्ध विविध घोटाळ्याचा गोपनीय अहवाल सादर केला होता. त्यानंतर भुजबळ यांच्यासह सार्वजनिक बांधकाम विभागाच्या काही अधिकाऱ्यांवर गुन्हे दाखल करण्यात आले. गुन्हे दाखल होताच एसीबीने घोटाळेबाज अधिकाऱ्यांच्या घरावर छापे टाकले. या छाप्यांतून कोट्यवधी रुपयांच्या संपत्तीचे घबाड हाती लागले होते. अधिकाऱ्यांवरील छाप्यानंतर भुजबळ हेही एसीबीच्या रडारवर आले होते. अखेर आज त्यांच्यावर कारवाईची कुऱ्हाड कोसळली.
सूड भावनेने कारवाई
राष्ट्रवादी काँग्रेसने छगन भुजबळ यांची पाठराखण करत ही कारवाई सरकार सूड भावनेनं व आकसानं करत असल्याचा आरोप केला आहे. राष्ट्रवादीच्या नेत्यांना बदनाम करण्यासाठीच ही मोहीम चालवली जात आहे,’ असं राष्ट्रवादीचे प्रवक्ते नवाब मलिक यांनी म्हटले आहे.
मुंबईत येथे पडले छापे:
सुखदा – वरळी, माणिकमह – चर्चगेट, मिलिशिया – भायखळा, साईकुंज कार्यालय – दादर, सागर मंदिर – शिवाजी पार्क, राहतं घर – सांताक्रूझ