श्रीकांतचा जन्म नागपूरमधील एका गरीब घरात झाला. अभ्यासात हुशार असलेल्या श्रीकांतला घरच्या परिस्थितीमुळं नेहमीच संघर्षाचा सामना करावा लागला. सुरक्षा रक्षक असलेल्या वडिलांच्या तुटपुंज्या पगारात घर चालवणं कठीण असल्यानं त्यानं कुटुंबाला मदत करण्यासाठी व स्वत:च्या शिक्षणासाठी रिक्षा चालवायचा निर्णय घेतला. रिक्षा चालवण्याबरोबरच तो डिलिव्हरी बॉय म्हणूनही काम करायचा. याच कामाच्या निमित्तानं श्रीकांतची भेट एकदा स्टॉल चालवणाऱ्या एका वेंडरशी झाली. ‘एव्हिएशन रेग्युलेटर डीजीसीए’ यांनी डायरेक्टोरेट जनरल ऑफ सिव्हिल एव्हिएशन पायलटसाठी स्कॉलरशिप सुरू केल्याची माहिती श्रीकांतला या वेंडरकडून मिळाली. या स्कॉलरशिपसाठी श्रीकांतनं मध्य प्रदेशातील हवाई वाहतुकीचं प्रशिक्षण देणाऱ्या संस्थेत प्रवेश घेतला. तिथं प्रवेश मिळाल्यानंतर संधीचं सोनं करत त्यानं सर्व परीक्षांमध्ये यश मिळवले.
प्रशिक्षण पू्र्ण केल्यानंतर श्रीकांतला जॉबसाठी काही काळ वाट पाहावी लागली. दरम्यान त्यानं अन्य ठिकाणीही काम केलं. काही दिवसांनंतर श्रीकांतला ‘इंडिगो एइरलाइन्स’ या विमान कंपनीकडून सेकंड पायलट म्हणून नियुक्ती करण्यात आल्याचं कळवण्यात आलं.
श्रीकांतची यशोगाथा मासिकात, ट्वीटरवर
‘इंडिगो एअरलाइन्स’नं श्रीकांतला केवळ नोकरीच दिली नाही, तर त्यांच्या कष्टाची कहाणी इंडिगो कंपनीने आपल्या मासिकात छापून ट्विटरवर शेअरही केली आहे. श्रीकांतची ही यशोगाथा इतर विद्यार्थ्यांना प्रेरणादायी ठरेल, असा विश्वासही कंपनीनं व्यक्त केला आहे.