भारतात महाविद्यालयातील ड्रेस कोडची चर्चा कायमच सुरू असते. विदेशातील महाविद्यालयात ‘पेहराव स्वातंत्र्या’चे दाखले कायम दिले जातात. मात्र आता लंडनमध्येही एका विद्यालयाने विद्यार्थिनींसाठी ड्रेस कोड लागू केला आहे. विद्यालयात विद्यार्थिनींनी शॉर्ट स्कर्टवर वापरू नये असे सांगण्यात आले आहे. त्या ऐवजी सूट घालावा असे सांगण्यात आले आहे.
विद्यार्थी आणि विद्यार्थिनी या शिकण्यासाठी म्हणून विद्यालयात येतात. तेव्हा त्यांचे लक्ष हे अभ्यासावरच असावे. आपण कुठले कपडे घातल्याने अधिक आकर्षक दिसतो याकडे विद्यार्थ्यांचे लक्ष राहिले तर अभ्यासात लक्ष कसे लागणार, असे कारण पुढे करत हर्टफोर्डशरच्या सेंट मारग्रेट बोर्डिंग विद्यालयाने शॉर्ट स्कर्ट्सवर विद्यालयात येण्यास बंदी आणली आहे. तसेच विद्यार्थिनींनी मेकअप कमी करावा असेही सांगण्यात आले आहे. विद्यार्थ्यांनी शालीन पेहराव ठेवावा आणि कमीत कमी मेकअप करावा, असे या विद्यालयाच्या प्राचार्यांचे म्हणने आहे. ड्रेस कोड आणि कमी मेकअपमुळे विद्यार्थ्यांमध्ये ‘प्रोफेशनल आणि फोकस’ दृष्टिकोन पाहायला मिळेल, असेही त्यांनी सांगितले.
‘द टेलिग्राफ’ या वृत्तपत्राने या संदर्भात वृत्त प्रसिद्ध केले आहे. या वृत्तानुसार पालकांना मात्र विद्यालयाचा हा निर्णय मान्य नाही. त्यांनी यावर नाराजी व्यक्त केली आहे. विद्यार्थ्यांना व्यक्त होण्याचे संपूर्ण स्वातंत्र्य मिळाले पाहिजे, असे पालकांचे म्हणने आहे. एका पालकाने विद्यालय प्रशासनाला पत्र लिहून तक्रार केली आहे की, ‘तुम्ही असा जुनाट निर्णय विद्यार्थिनींवर का लादत आहात?’
विद्यालय मात्र आपल्या निर्णयावर ठाम आहे की, विद्यार्थ्यांना ड्रेस कोड लागू केला नाही तर ते आज कपडे कोणते घालायचे याचाच विचार करण्यात अधिक वेळ घालवतात. अभ्यासात लक्ष लागत नाही. मग विद्यालयात येण्याचा उपयोग काय?, असे हार्डी यांनी सांगितले. विद्यार्थ्यांचे कपडे शालिन, शरिराला चांगले वाटतील असे आणि आत्मविश्वास वाढवणारे पाहिजे. त्यांचे लक्ष विचलीत करणारे नको. विद्यालयातील मोठ्या वर्गातील विद्यार्थिनी या अन्य विद्यार्थिनींसाठी आदर्श असाव्यात, असेही हार्डी यांनी सांगितले.
नव्या ड्रेस कोडनुसार हेअर स्टाइल साधारण असली पाहिजे, तसेच नेलपेंट देखील जास्त चकचकीत नको असेही विद्यालयाकडून स्पष्ट करण्यात आले आहे.