दिल्लीतील राजपथावर २१ जूनला आंतरराष्ट्रीय योग दिनानिमित्त विशेष कार्यक्रमाचे आयोजन केले आहे. या कार्यक्रमाच्या समन्वयाचे काम ‘आयुष’ मंत्रालयाचे मंत्री श्रीपाद नाईक यांच्याकडे आहे. ते म्हणाले की, ‘सूर्यनमस्कार हे कोणत्याही धर्माशी संबंधित नाही. मात्र, तरीही यावरून वाद होऊ नये, म्हणून योगदिनी सूर्यनमस्कारांचा समावेश केला नाही. योगदिनी मुस्लिमांनी सहभागी व्हावे. त्यांनी योगासने करताना श्लोकांऐवजी ‘अल्लाह’चे नाव घ्यावे,’ असे त्यांनी सुचविले आहे.
योग दिनाच्या कार्यक्रमाला आणि त्यातील सूर्यनमस्काराला ‘ऑल इंडिया मुस्लिम पर्सनल लॉ बोर्डा’सह काही अल्पसंख्याक संघटनांनी विरोध दर्शवत सहभाग घेण्यास नकार दिला होता. तर, दाऊदी बोहरा समवेत अन्य काही मुस्लिम संघटनांच्या प्रतिनिधींनी नाईक यांची गुरुवारी भेट घेऊन, पंतप्रधानांच्या निर्णयाचे स्वागत केले. तसेच यात सहभागी होण्याची तयारी दर्शविली आहे. ‘नमाज पठणामध्येही योगासन आहे. मात्र, नमाज म्हणजे योगासन नाही. योगासने मानवाच्या आरोग्यासाठी आहेत. जे त्याला विरोध करतात ते मानवतेलाच विरोध करत आहेत,’ असे मत उत्तर प्रदेशातील ‘मजलिस उलेमा-ए-हिंद’चे अध्यक्ष सईद कौकाब मुजताबा अबिबि यांनी व्यक्त केले.
‘दारूल उलूम’चा पाठिंबा
दारूल उलूम या प्रमुख इस्लामी संघटनेने आंतरराष्ट्रीय योगदिनाला पाठिंबा जाहीर केला आहे. योग हा एक प्रकारचा व्यायामप्रकारच आहे. त्याचा धर्माशी संबंध लावू नये, असे उलूमने म्हटले आहे. योगासने करू नयेत, असा फतवा आपल्याकडून काढण्यात आलेला नाही, असेही स्पष्ट करण्यात आले आहे.
‘हे तर देशविरोधी’
योगदिनाला विरोध करून अकारण वाद निर्माण करणे ही देशविरोधी आणि समाजविरोधी कृती आहे, असे मध्य प्रदेश भाजपचे अध्यक्ष नंदकुमारसिंह चौहान यांनी म्हटले आहे. या मुद्द्यावरून अकारण वाद निर्माण करणारे देशाचे हित चिंतत नाहीत, असे ते म्हणाले. योग हा भाजपचा राजकीय कार्यक्रम नाही, असे त्यांनी स्पष्ट केले.