मध्य प्रदेशचे मुख्यमंत्री शिवराजसिंह चौहान यांनी आज आपल्या निवासस्थानी झालेल्या ‘महिला पंचायती’त अरुणा शानबाग यांना भावपूर्ण श्रद्धांजली वाहिली. १९७३ मध्ये केईएम हॉस्पिटलच्या वॉर्डबॉयनं केलेल्या प्राणघातक हल्ल्यानंतर कोमात गेलेल्या आणि गेली ४२ वर्षे अंथरुणाला खिळून मृत्यूशी झुंज देणाऱ्या अरुणा शानबाग यांनी काल जगाचा निरोप घेतला होता. त्यांचं जाणं सगळ्यांनाच चटका लावून गेलं. या निधनाबद्दल शिवराजसिंह यांनीही दुःख व्यक्त केलं.
अरुणा शानबाग या सन्मानाचं प्रतीक आहेत. त्यांच्यासोबत जे झालं ते दुर्दैवीच होतं. त्यापासून धडा घेऊन कायद्याची समीक्षा करणं गरजेचं आहे. पुरुषप्रधान समाजाची मानसिकता बदलावी लागेल. आणखी किती काळ महिलांचं शोषण आपण सहन करणार आहोत? त्यांना या दुष्टचक्रातून सोडवावंच लागेल, अशा भावना शिवराज चौहान यांनी व्यक्त केल्या. अरुणा यांच्या सन्मानार्थ, स्मृतिप्रित्यर्थ, त्यांच्या नावाने मध्य प्रदेश सरकार पुरस्कार देणार असल्याची घोषणाही त्यांनी केली. महिला सबलीकरण आणि महिलाच्या शोषणाविरोधात उल्लेखनीय काम करणाऱ्या संस्थेला एक लाख रुपयांचा पुरस्कार देऊन गौरविण्यात येणार असल्याचं त्यांनी सांगितलं. त्यांची ही घोषणा म्हणजे अरुणा यांना आगळी श्रद्धांजलीच आहे.