लग्नघटिका जवळ आली आहे. वधू-वर हातात पुष्पमाला घेऊन उभे आहेत. वऱ्हाड्यांना अक्षताही वाटण्यात आल्या आहेत. इतके सगळे झाल्यानंतर पुढे काय होणार?… अर्थात शुभमंगल सावधान! कोणालाही असेच वाटेल; पण उत्तर प्रदेशातील कानपूरमध्ये तसे काहीच झाले नाही. शुभमंगल..सावधान म्हणण्यापूर्वी नवरी बोहल्यावरून उतरली आणि तिने थेट नवऱ्याचे वऱ्हाडच माघारी धाडले. नवरीच्या या वर्तनाला कारण ठरला नवऱ्याच्या बापाचा अती उत्साह! सगळी मंडळी लग्नाच्या गडबडीत असताना सासरेबुवांनी लाजलज्जा न बाळगता नवरीशेजारी उभ्या असलेल्या मुलीचे चुंबन घेतले. ही मुलगी नवरीची चुलत बहीण निघाली आणि तिथेच सगळे बिनसले. कानपूर जिल्ह्यातील फारुखाबाद येथे ही घटना घडली. नागला खैरबंद येथील रुची दयालचा विवाह जैथरा येथील राजेशसोबत ठरला होता. लग्नाच्या दिवशी दोन्हीकडील वऱ्हाडी मंडळी जमली. सुरुवातीचे सगळे विधी उत्साहात पार पडले. लग्नाचा मुहूर्त जवळ आला तशी स्टेजवर गर्दी झाली. नवरीसोबत तिच्या काही मैत्रिणी स्टेजवर होत्या. नेमक्या त्याच वेळी नवऱ्याच्या वडिलांनी म्हणजेच बाबुराम याने स्टेजवर असलेल्या मुलींपैकी एका मुलीचे चुंबन घेतले. पाहुणेमंडळींच्या समोर घडलेल्या या प्रकारामुळे नवरीचे कुटुंब स्तब्धच झाले. नवऱ्या मुलीला ही गोष्ट कळताच ती खवळली आणि नैतिकतेच्या आधारावर लग्न मोडण्याचा निर्णय घेतला.
सासरेबुवांच्या चुंबन, मोडले लग्न
