मी तुझ्यासाठी आकाशातून चंद्र… तू म्हणशील ते करेन, मग माझ्याशी लग्न करशील ना असं म्हणत आपलं प्रेम व्यक्त करणारे, लग्नाची मागणी घालतात हे आपण सिनेमात पाहिलं आहे. मात्र अशी मागणी थेट अमेरिकेचे राष्ट्राध्यक्ष बराक ओबामा यांच्या १६ वर्षाच्या मुलीला आल्याने जगभर चर्चा रंगली आहे.
एका नौरोबियन वृत्तपत्राने फेलिक्स किपरोनो नावाच्या वकिलाची मुलाखत प्रसिद्ध केली आहे. यात फेलिक्स याने म्हटले आहे की, माझं मालिया ओबामावर अत्यंत प्रेम आहे, म्हणूनच मी तिला लग्नासाठी मागणी घालणार आहे. मालियाशी लग्न करण्यासाठी फेलिक्सने ५० गायी, ७० मेंढ्या आणि ३० बकऱ्या देण्याची अजब ऑफरही देऊ केली आहे.
‘२००८ मध्ये मला मालियामध्ये रुची निर्माण झाली. त्यावेळी ओबामा पहिल्यांदा अध्यक्षपदासाठी निवडणूक लढवत होते आणि तेव्हा मालियाचं वय अवघं १० वर्ष होतं.’, असंही फेलिक्सने सांगितले आहे.
इतकचं नाही तर फेलिक्सने आपलं प्रेम किती सच्चं आहे, हे सांगण्यासाठी आपण कुणालाही डेट केलेलं नाही, असंही मुलाखती दरम्यान म्हटलं आहे. माझ्या आई-वडिलांना देखील जेव्हा मी हे सांगितलं तेव्हा त्यांनी मला पाठिंबा दिला, असं त्याने स्पष्ट केलं आहे.
हा प्रस्ताव ओबामांपर्यंत पोहोचवण्यासाठी फेलिक्स एक पत्र लिहीत असून ते पत्र व्हाइट हाऊसचे संबंधित अधिकारी त्यांच्यापर्यंत पोहोचवतील अशी आशा फेलिक्सला वाटते. ‘ओबामा जुलैमध्ये केनिया दौऱ्यावर येतील तेव्हा मालियालाही सोबत आणतील’, असा विश्वासही फेलिक्सने व्यक्त केला आहे.
‘असं असलं तरी माझी नजर ओबामांच्या संपत्तीवर बिलकूल नाही. माझं मालियावर खरं प्रेम आहे’, असं फेलिक्सने स्पष्ट म्हटलं आहे.
मालियासोबत मला अगदी साधं आयुष्य जगण्याची माझी इच्छा असून मी मालियाला गाईचं दूध काढायला आणि उगाली व मुरसिक तयार करायलाही शिकवणार आहे. अगदी केनियातील आदिवासी महिला करतात तसं शिकवणार, असल्याचेही फेलिक्सने आपल्या मुलाखतीत म्हटलं आहे.