आजारातून बरे करण्याचे आणि घरात गाडले गेलेले गुप्तधन काढून देण्याचे आमिष दाखवून एका महिलेची तब्बल 4 लाख रुपये आणि सोन्याच्या दागिन्यांची फसवणूक केल्याचा धक्कादायक प्रकार उल्हासनगरमध्ये उघडकीस आला आहे. या भोंदूगिरीचा आणि अघोरी पूजेचा सर्व प्रकार घरातील सीसीटीव्ही कॅमेऱ्यात कैद झाला असून, याप्रकरणी उल्हासनगरच्या हिल लाईन पोलीस ठाण्यात (Hill Line Police Station) 5 जणांविरोधात गुन्हा नोंदवण्यात आला आहे.
मिळालेल्या माहितीनुसार, उल्हासनगर कॅम्प 5 परिसरात राहणाऱ्या एका पीडित महिलेची तिच्या एका मैत्रिणीच्या माध्यमातून बब्बू गुरू आणि पम्मी गुरू यांच्याशी ओळख झाली होती. महिलेच्या घरातील आजारपण घालवून देतो आणि घराच्या देवघराखाली असलेले गुप्तधन काढून देतो, असे सांगून या भोंदू बाबांनी महिलेचा विश्वास संपादन केला.
गुप्तधन काढण्यासाठी आणि आजारपणाच्या निवारणासाठी भोंदू बाबांनी महिलेच्या घरात देवघराखाली अघोरी पूजा मांडली. या पूजेच्या नावाखाली भोंदू बाबांनी पीडित महिलेकडून रोख 4 लाख रुपये आणि मौल्यवान सोन्याचे दागिने उकळले. मात्र, अघोरी पूजेनंतरही घरात काहीही निष्पन्न झाले नाही आणि आजारपणही दूर झाले नाही. आपली फसवणूक झाल्याचे लक्षात आल्यानंतर महिलेने बब्बू गुरूकडे आपल्या पैशांची आणि दागिन्यांची मागणी केली. मात्र, पैसे परत देण्याऐवजी भोंदू बाबांनी महिलेला जीवे मारण्याची धमकी दिली.
फसवणूक झाल्याचे लक्षात येताच हतबल झालेल्या महिलेने हिल लाईन पोलीस ठाण्यात (Hill Line Police Station) धाव घेतली. मात्र, सुरुवातीला पोलिसांनी या तक्रारीकडे दुर्लक्ष केल्याचा आरोप पीडित महिलेने केला आहे. दरम्यान, घरातील देवघराखाली सुरू असलेल्या अघोरी पूजेचे सर्व दृश्य सीसीटीव्ही कॅमेऱ्यात कैद झाले होते. हा धक्कादायक व्हिडिओ सोशल मीडियावर व्हायरल झाल्यानंतर मात्र पोलिसांनी तातडीने सूत्रे हलवली. व्हायरल व्हिडिओच्या आधारे पोलिसांनी तक्रार नोंदवून घेत बब्बू गुरू, पम्मी गुरू याच्यासह एकूण 5 जणांवर भादंवि आणि अंधश्रद्धा विरोधी कायद्यांतर्गत गुन्हा दाखल केला आहे.
नागरिकांनी अशा कोणत्याही भोंदू बाबांच्या, अघोरी पूजेच्या किंवा गुप्तधनाच्या अमिषाला बळी पडू नये, असे कळकळीचे आवाहन पीडित महिलेने आणि पोलिसांनी केले आहे. सध्या पोलीस सीसीटीव्ही फुटेजच्या आधारे पुढील तपास करत असून आरोपींचा शोध सुरू आहे.