सकाळी नेहमीप्रमाणे दिनक्रम सुरू असताना अचानक घडलेल्या एका दुर्दैवी घटनेनं संपूर्ण परिसर हादरून गेला आहे. जिममध्ये नियमित वर्कआऊट करत असताना एका 30 वर्षीय तरुणाचा चक्कर येऊन मृत्यू झाला. ही घटना सकाळी सात वाजेच्या सुमारास घडली. रोजच्या सवयीनुसार व्यायामासाठी गेलेल्या तरुणाला हृदयविकाराच्या तीव्र झटक्याने मृत्यू झाल्याचा प्राथमिक अंदाज वर्तवला जात असून, या घटनेमुळे बहिरगाव आणि कन्नड शहरात मोठी हळहळ व्यक्त केली जात आहे. अंकुश कडूबा रावते (वय 30, रा. बहिरगाव, ता. कन्नड) असं मृत तरुणाचं नाव आहे.
अचानक चक्कर येऊन खाली कोसळला
दरम्यान, या प्रकरणी मिळालेल्या माहितीनुसार, अंकुश रावते हा बहिरगाव ते पाणपोई फाटा रस्त्यावरील बळीराजा नर्सरीचा मालक होता. तो अत्यंत मेहनती आणि मनमिळाऊ स्वभावाचा तरुण म्हणून परिसरात ओळखला जात होता. सकाळी त्याने नेहमीप्रमाणे आपल्या पुतणीला आनंदाने शाळेत सोडलं. त्यानंतर तो आपल्या दिनक्रमाप्रमाणे कन्नड शहरातील एका खासगी जिममध्ये व्यायामासाठी पोहोचला. तिथे नेहमीप्रमाणे त्याने वर्कआऊट सुरू केलं. मात्र, सकाळी सात वाजेच्या सुमारास व्यायाम करत असताना अचानक त्याच्या छातीत तीव्र वेदना झाल्या आणि तो अचानक चक्कर येऊन खाली कोसळला.
रुग्णालयात पोहोचण्यापूर्वीच मालवली प्राणज्योत
अंकुश अचानक खाली पडल्याचं पाहताच जिममधील इतर सदस्यांनी आणि मित्रांनी तातडीने त्याच्याकडे धाव घेतली. त्याना शुद्धीवर आणण्याचा प्रयत्न करण्यात आला, मात्र कोणताही प्रतिसाद न मिळाल्यानं उपस्थितांनी क्षणाचाही विलंब न करता त्याना बेशुद्ध अवस्थेत कन्नड ग्रामीण रुग्णालयात दाखल केलं. तेथील वैद्यकीय अधिकाऱ्यांनी तातडीने तपासणी केली, परंतु रुग्णालयात पोहोचण्यापूर्वीच त्याची प्राणज्योत मालवली होती. डॉक्टरांनी त्याला मृत घोषित केलं.
कुटुंबावर कोसळला दुःखाचा डोंगर
सध्याच्या धावपळीच्या युगात अवघ्या 30व्या वर्षी अंकुश याच्यासारख्या तरुणाचा असा अचानक मृत्यू झाल्यानं त्याच्या मित्रांना आणि नातेवाईकांना मोठा धक्का बसला आहे. या दुर्देवी घटनेची माहिती मिळताच ग्रामीण रुग्णालयात नातेवाईकांनी मोठी गर्दी केली होती. अंकुश रावते याच्या पश्चात आई, वडील, पत्नी, दोन लहान मुली आणि दोन भाऊ असा मोठा परिवार आहे. कुटुंबातील कमावत्या आणि चिमुकल्यांचं छत्र हरपल्यानं रावते कुटुंबावर दुःखाचा डोंगर कोसळला आहे. या घटनेप्रकरणी कन्नड शहर पोलीस ठाण्यात अकस्मात मृत्यूची नोंद करण्यात आली आहे.
मैत्रिणीच्या जबाबामुळे प्रकरणात नवीन ट्विस्ट
स्पर्धा परीक्षेची तयारी करण्यासाठी शहरात आलेल्या 22 वर्षांच्या एका तरुणीचं आमिष दाखवून अपहरण करण्यात आल्याचा धक्कादायक प्रकार समोर आला आहे. मे 2024 पासून बेपत्ता असलेल्या या विद्यार्थिनीचा कोणताही सुगावा लागत नव्हता. मात्र, तिच्या एका मैत्रिणीने दिलेल्या अत्यंत महत्त्वाच्या माहितीमुळे या प्रकरणाच्या तपासाला अचानक वेगळं वळण मिळालं. हतबल वडिलांनी मुंबई उच्च न्यायालयाच्या औरंगाबाद खंडपीठात धाव घेतल्यानंतर क्रांती चौक पोलीस ठाण्यात रोहित राजपूत नावाच्या संशयित तरुणावर अपहरणाचा गुन्हा दाखल करण्यात आला आहे.