नेव्ही नगर सामूहिक मृत्यू प्रकरणात हादरवणारी माहिती, पत्नी- मुलांचा मृत्यू होईपर्यंत थांबला अन् मग…; मोबाईल ठरणार महत्त्वाचा पुरावा?

मिळालेल्या माहितीनुसार, पुरणमलने पत्नी आणि दोन्ही मुलांना विष दिल्यानंतर त्यांचा मृत्यू झाला आहे का? याची खात्री केली. त्यानंतर काही तासांनंतर त्याने आत्महत्या केल्याचा संशय आहे. कारण जेव्हा पोलीस घटनास्थळी पोहोचले तेव्हा तिन्ही मृतदेह कुजण्यास सुरुवात झाली होती. शवविच्छेदन अहवालातून मृत्यूची नेमकी वेळ स्पष्ट होणार आहे.

मोबाईल ठरणार महत्त्वाचा पुरावा?

पुरणमलने पत्नी आणि मुलांच्या हत्येनंतर मोचाईलमधील तपशील डिलीट केला आहे. त्यात नेमके काय होते? हे जाणून घेण्यासाठी त्याच्या मोबाईलमधील तपशील पुन्हा मिळविण्यासाठीही पोलिसांनी प्रयत्न सुरू केले आहेत. तसंच, नेव्हीनगरमधील या हत्याकांडामागे कौटुंबिक वाद नेमका कोणत्या कारणातून विकोपाला गेला, याचा तपास पोलिसांकडून सुरू आहे. याशिवाय मालमत्तेचा वाद, नोकरीशी संबंधित प्रश्न तसेच आर्थिक देवाणघेवाणीचे व्यवहार यांचाही तपासाच्या कक्षेत समावेश करण्यात आला आहे.

डिसेंबर 2020 मध्ये पुरणमल आणि ओमाचा विवाह झाला होता. मात्र, गेल्या काही काळापासून पुरणमल मानसिक तणावात होता, त्यावर उपचार देखील सुरू होते. त्याला आकडीचाही त्रास होता. दोघांमधील वाद वाढत गेले. मुलीची अवस्था पाहून तिचे वडील 9ऑगस्ट रोजी तिला घेण्यासाठी घरी पोहोचले. त्यांनी पुरणमलची समजूत काढण्याचा प्रयत्न केला. मात्र तो तयार नव्हता.

असा होता घटनाक्रम

14 ऑगस्ट : रात्री 11 वाजता वडिलांना संदेश

15 ऑगस्ट : सकाळी 6 वाजता आईने संदेश वाचून कुटुंबियांना कळवताच मेहरा कुटुंबियांना फोन सुरू

सायंकाळी 7 वाजता नौदल नियंत्रण कक्षात कॉल करून माहिती

रात्री 11 वाजता : कफ परेड पोलिसांना आत्महत्येबाबत माहिती मिळताच पोलीस घटनास्थळी दाखल

रात्री 11 वाजता :कुटुंबियांना मेहरा कुटुंबियांच्या मृत्यूची माहिती

16 ऑगस्ट : रात्री शवविच्छेदनानंतर मृतदेह कुटुंबियांच्या ताब्यात