नवी मुंबईतील खारघर-पनवेल परिसरात वास्तव्यास असलेल्या विदर्भातील नागरिकांसाठी ‘ विदर्भ भवन ’ उभारण्याच्या प्रस्तावाला आता गती मिळाली आहे. खारघर येथे उपलब्ध असलेल्या दोन एकर जागेचा प्रस्ताव शासनाकडे सादर करण्याचे निर्देश महसूलमंत्री चंद्रशेखर बावनकुळे यांनी रायगडचे जिल्हाधिकारी आणि सिडकोच्या व्यवस्थापकीय संचालकांना दिले. आमदार प्रवीण दटके यांच्या पाठपुराव्यामुळे या प्रकल्पाच्या दृष्टीने महत्त्वाचा निर्णय झाला आहे.
या उद्देशाने ‘विदर्भ भवन’ उभारण्याची मागणी
नवी मुंबई , खारघर आणि पनवेल परिसरात विदर्भातील मोठ्या संख्येने कुटुंबे वास्तव्यास आहेत. या नागरिकांना सामाजिक, सांस्कृतिक आणि शैक्षणिक उपक्रमांसाठी हक्काचे केंद्र उपलब्ध व्हावे, तसेच विदर्भातून नवी मुंबईत येणाऱ्या नागरिकांना तात्पुरत्या स्वरूपात विविध सुविधा मिळाव्यात, या उद्देशाने ‘विदर्भ भवन’ उभारण्याची मागणी करण्यात आली होती.
मुख्यमंत्री तसेच महसूलमंत्री चंद्रशेखर बावनकुळे यांच्याकडे मागणी
हिवाळी अधिवेशन २०२६ दरम्यान आमदार प्रवीण दटके यांनी मुख्यमंत्री तसेच महसूलमंत्री चंद्रशेखर बावनकुळे यांच्याकडे या मागणीसाठी पाठपुरावा केला होता. भवनासाठी शासनाकडून दोन एकर जागा उपलब्ध करून द्यावी आणि आवश्यकता भासल्यास प्रकल्पासाठी सीएसआर निधीचा वापर करण्याची परवानगी द्यावी, अशी मागणी त्यांनी केली होती.
दोन एकर जागेचा प्रस्ताव शासनाकडे सादर करण्याचे निर्देश
या पार्श्वभूमीवर झालेल्या बैठकीत बावनकुळे यांनी खारघर परिसरातील उपलब्ध दोन एकर जागेचा प्रस्ताव शासनाकडे सादर करण्याचे निर्देश दिले. बैठकीत आमदार प्रवीण दटके व्हिडीओ कॉन्फरन्सिंगद्वारे सहभागी झाले होते. आमदार विक्रांत पाटील तसेच विदर्भ सेवा फाउंडेशनचे चित्तरंजन टेंभेकर यांचीही उपस्थिती होती.
विदर्भ भवनाची गरज निदर्शनास आणून देण्यात आले.
‘विदर्भ सेवा सहयोग फाउंडेशन’ या संस्थेमार्फत नवी मुंबई, खारघर आणि पनवेल परिसरातील विदर्भातील नागरिकांसाठी विविध सामाजिक, सांस्कृतिक आणि शैक्षणिक उपक्रम राबविले जात आहेत. या उपक्रमांना कायमस्वरूपी व्यासपीठ मिळावे, यासाठी विदर्भ भवनाची गरज असल्याचे शासनाच्या निदर्शनास आणून देण्यात आले.