मुंबईतील मानखुर्द परिसरात बांधकाम सुरु असलेल्या ठिकाणी क्रेन कोसळून एका पोलिसाचा मंगळवारी रात्री मृत्यू झाला. संतोष चव्हाण असे ४८ वर्षीय मयत पोलीस कॉन्स्टेबलचे नाव आहे. ते नेहरुनगर पोलिस ठाण्यात कार्यरत होते. त्यांच्या अपघाती मृत्यूमुळे मुंबई पोलिस दलामध्ये हळहळ व्यक्त होत आहे. या घटनेची गंभीर दखल पोलिसांनी घेतली असून निष्काळजीमुळे मृत्यूस कारणीभूत ठरल्याचा गुन्हा दाखल करण्यात आला आहे. जबाबदार असलेल्या सर्वांवर कारवाई करण्यात येईल, असे पोलिसांनी सांगितले.
क्रेनचा बाईकस्वार पोलिसाला फटका
मानखुर्द परिसरात एमएमआरडीएच्या उड्डाणपुलाच्या बांधकामाचे काम सुरु होते. या ठिकाणी वापरण्यात येणारे ड्रिलिंग मशीन रस्त्याच्या कडेला पार्क करण्यात आले होते. मंगळवारी रात्री संतोष चव्हाण हे त्याच मार्गाने दुचाकीने नेरुळला घरी परतत होते. याच दरम्यान जमीन खचली आणि क्रेन दुचाकीवरून जाणाऱ्या चव्हाण यांच्या अंगावर कोसळली. या अपघातात जखमी झालेल्या चव्हाण यांना रुग्णालयात नेण्यात आले. मात्र दाखल करण्यापूर्वीच डॉक्टरांनी त्यांना मृत घोषित केले. चव्हाण यांच्या पश्चात पत्नी, मुलगा आणि मुलगी असा परिवार आहे.
रुग्णालयात नेईपर्यंत उशीर झाला
पोलिसांनी दिलेल्या माहितीनुसार, रात्री साधारण ९.४५ वाजता टाटा पॉवर हाऊसजवळ क्रेन रस्त्यावर कोसळली. क्रेनचे काही भाग संतोष चव्हाण यांच्या शरीरावर आदळले, त्यामुळे ते जागीच कोसळले. तेथून जाणाऱ्या पादचारी आणि वाहन चालकांनी चव्हाण यांना तातडीने वाशी येथील एमजीएम रुग्णालयात दाखल केलं; मात्र तोपर्यंत उशीर झाला होता.
बीएमसीच्या एका वरिष्ठ अधिकाऱ्याने सांगितले, “महाराष्ट्र नगर येथील जीएमएलआर उड्डाणपूल प्रकल्पाच्या कामाच्या ठिकाणी तैनात असलेले ‘पायलिंग रिग’ यंत्र, त्याच प्रकल्पाच्या दुसऱ्या एका ठिकाणी हलवले जात असताना उलटले; त्यावेळी ही घटना घडली. संबंधित कंत्राटदारावर कारवाई केली जाईल.” बीएमसीचे उप-महापालिका आयुक्त (पायाभूत सुविधा) या घटनेची चौकशी करत असून, ते आपला अहवाल सादर करतील, असेही या महापालिका अधिकाऱ्याने पुढे नमूद केले.
अपघातास कारणीभूत असलेल्यांवर गुन्हा
पार्कसाईट पोलीस ठाण्यात कार्यरत असलेल्या चव्हाण यांच्या भावाने दाखल केलेल्या तक्रारीच्या आधारे, मानखुर्द पोलिसांनी ‘SFAR Infratech’ चे पदाधिकारी — मालक रेहान मोहम्मद अस्लम मलिक, अभियंता रंजन कुमार शुक्ला आणि साईट सुपरवायझर शाहिर मुख्तार शेख — तसेच ‘Lifting and Lashing Solution India’ चे कर्मचारी — मालक मोहम्मद सौद हैदर अली चौधरी, अभियंता सलमान इम्रान खान, मशीन ऑपरेटर सुदीप्ता दयाल प्रामाणिक आणि मदतनीस रिजू श्रीधर विश्वास — यांच्या विरोधात गुन्हा दाखल केला आहे. या वर्षी शहरात पायाभूत सुविधांच्या कामाच्या ठिकाणी घडलेली ही दुसरी प्राणघातक घटना ठरली आहे. यापूर्वी, १४ फेब्रुवारी रोजी मुलुंड पश्चिम येथील एलबीएस रस्त्यावर, निर्माणाधीन ‘एलिव्हेटेड मेट्रो लाईन ४’ (वडाळा–कासारवडवली) च्या उड्डाणपूलाचा काँक्रीटचा एक कठडा रिक्षा आणि कारवर कोसळला होता; या घटनेत ५० वर्षीय व्यक्तीचा मृत्यू झाला, तर अन्य तीन जण जखमी झाले होते.