चमचमीत मिसळ…गरमागरम बिर्याणी…चहा – कॉफी अशा सर्वच खाद्यपदार्थ आणि पेय बनवण्यासाठी ठाणे महापालिकेच्या उपहारगृहात गॅस नसल्याने येथील अधिकारी-कर्मचारी हवालदिल झाले आहेत. पश्चिम आशियातील युद्धजन्य स्थितीमुळे निर्माण झालेल्या गॅस तुडवड्याचा फटका उपहारगृहाला बसला आहे. अशा परिस्थितीमध्ये इंडक्शन शेगडीवर तात्पुरत्या स्वरूपात अधिकारी – कर्मचाऱ्यांची भूक भागवली जात आहे. ठाणे शहरातील गॅस तुटवड्याप्रश्नी महापौर शर्मिला पिंपळोलकर यांनी तातडीची बैठक घेत प्रशासनाला निर्देश दिले आहेत.
पश्चिम आशियातील युद्धजन्य स्थितीच्या पार्श्वभूमीवर शहरात घरगुती गॅस पुरवठ्यावर तूर्तास कोणताही परिणाम झाला नसल्याचा निर्वाळा ठाणे प्रशासनाने दिला आहे. मात्र व्यावसायिक ठिकाणी इंधन पुरवठा मर्यादित असल्याने हॉटेल, उपहारगृहाचे चालक – मालक चिंताग्रस्त आहेत. पालिका मुख्यालयातही कामानिमित्ताने येणारे नागरिक तसेच कर्तव्यावर हजर असणारे कर्मचारी आणि अधिकाऱ्यांना नाश्ता, जेवण, चहा व कॉफी उपहारगृहातून दिली जाते. नागरिकांना मुख्यालयाच्या तळमजल्यावर उपाहारगृहात बसून जेवणाची सोय आहे. तसेच सर्वपक्षीय लोकप्रतिनिधी आणि अधिकारी – कर्मचाऱ्यांच्या दालनात उपहारगृहातून खाद्यपदार्थ, चहा व कॉफी पाठवली जाते. मात्र गॅसच्या तुडवड्यामुळे शुक्रवारी या पुरवठ्यावर परिणाम झाला.
चहा, कॉफीची तहान शीतपेयांवर
चहा, कॉफी बनवण्यासाठी गॅस नसल्याने दालनात गरम पाण्याच्या किटलीचा वापर करून ग्रीन अथवा ब्लॅक टी देणे, तसेच उन्हाच्या झळांचा विचार करता शीतपेय, बाहेरील खाद्यपदार्थांच्या पार्सल सेवेवर लोकप्रतिनिधी, अधिकारी – कर्मचारी अवलंबून आहेत.
आढावा बैठकीत निर्देश
शहरातील या गॅसप्रश्नांवर ठाणे महापालिका प्रशासनाची महापौर आढावा बैठक महापौर शर्मिला पिंपळोलकर यांनी बैठक घेतली. यावेळी प्रशासनाला ही परिस्थिती योग्यरित्या हाताळण्याचे निर्देशही महापौर पिंपळोलकर यांनी दिल्याची माहिती पालिका अधिकाऱ्यांनी दिली.