काश्मीरमध्ये चकमकीत दोन दहशतवादी ठार

पोलिस दल सोडून दहशतवादी संघटनेमध्ये सहभागी झालेल्या दोघा अतिरेक्यांना गुरुवारी पहाटे लष्कराच्या जवानांनी जम्मू-काश्मीरच्या दोडा जिल्ह्यामध्ये झालेल्या चकमकीत ठार मारले.

लष्कराच्या जवानांनी दोडा पट्ट्यात रात्री उशिरा कारवाई सुरु केली होती. पहाटे साडेचारच्या सुमारास हे दोन दहशतवादी ठार झाले अशी माहिती लष्कराचे प्रवक्ते एस.एन.आचार्य यांनी दिली.

या दोन्ही दहशतवाद्यांची ओळख पटली असून, गुलाम नबी मंगनू आणि रईझ अहमद अशी त्यांची नावे आहेत.

आम्ही या दोन्ही अतिरेक्यांच्या मागावर होतो अखेर गडी नाल्लाहमध्ये चकमकीत या दोन्ही दहशतवाद्यांना कंठस्नान घातले. या दहशतवाद्यांजवळील शस्त्रास्त्रे जप्त करण्यात आली आहेत अशी माहिती जम्मू झोनचे आयजी दानिश राणा यांनी दिली.