शहरातील स्टेशन रोडवर न्यायालयासमोर गुरुवारी दुपारी चार वाजेच्या सुमारास झालेल्या भीषण अपघातात महाविद्यालयात शिक्षण घेणाऱ्या १९ वर्षीय तरुणीचा दुर्दैवी मृत्यू झाला. भरधाव वेगाने विरुद्ध दिशेने जाणाऱ्या वाहनाने तरुणीला जोरदार धडक दिल्याने ही घटना घडली.
दि.२२ रोजी सायंकाळी ४ वाजेच्या सुमारास प्रियांका कोळी ही पायी चालत जात असताना, समोरून येणाऱ्या एका पाणी पुरवठा करणाऱ्या वाहनाने तिला जोरदार धडक दिली. हे वाहन इतक्या प्रचंड वेगात होते की, तरुणीला धडक दिल्यानंतर ते रस्त्याच्या कडेला असलेल्या खोल खड्ड्यात जाऊन पलटी झाले. या धडकेत प्रियांकाच्या डोक्याला गंभीर दुखापत झाली होती. अपघातानंतर स्थानिक नागरिकांच्या मदतीने रुग्णवाहिका उपचारार्थ शिंदखेडा ग्रामीण रुग्णालयाहून येथील हिरे रुग्णालयात दाखल केले असता उपचारापूर्वी मृत्यू झाला.
भडणे येथील प्रियंका रावसाहेब कोळी (वय २१) ही एसएसव्हीपीएस महाविद्यालयात प्रथम वर्ष विज्ञान शाखेत शिक्षण घेत होती. भडणे येथून ती रोज शहरात येत होती. ती गुरुवारी महाविद्यालयातून घरी परत जात असताना भगवा चौक परिसरात न्यायालयाच्या बाजूला फिल्टर पाण्याचे जार वाहून नेणाऱ्या मालवाहतूक वाहनाने तिला जोरदार धडक दिली. या धडकेत प्रियंकाच्या डोक्याला व चेहऱ्यावर गंभीर दुखापत झाली. अपघातानंतर नागरिकांनी तिला तत्काळ शिंदखेडा ग्रामीण रुग्णालयात दाखल केले. मात्र, प्रकृती गंभीर असल्याने तिला १०८ रुग्णवाहिकेद्वारे धुळे येथील जिल्हा रुग्णालयात हलवण्यात आले. जिल्हा रुग्णालयात दाखल केल्यानंतर तपासणी अंती प्रियंकाला मृत घोषित करण्यात आले.
दरम्यान, नागरिकांनी दिलेल्या माहितीनुसार, संबंधित वाहनाचा चालक राहुल पाटील (रा. वरुळ) हा मद्यधुंद अवस्थेत होता. ओव्हरटेक करताना वाहनावरील नियंत्रण सुटल्याने हा अपघात झाल्याचे सांगण्यात येते आहे. अपघातानंतर धडक देणारे वाहन रस्त्याच्या कडेला जाऊन उलटले. घटनेत चालक पाटील किरकोळ जखमी झाला. घटनेत वाहनाचे मोठ्या प्रमाणात नुकसान झाले आहे. अपघातामुळे शहरातील स्टेशन रोड परिसरात काही काळ तणावाचे वातावरण निर्माण झाले होते.
विज्ञान शाखेची हुशार विद्यार्थिनी
मृत प्रियंका ही शिंदखेडा येथील एस.एस.व्ही.पी. एस. महाविद्यालयात विज्ञान शाखेच्या प्रथम वर्षात शिक्षण घेत होती. ती मुळची भडणे गावची रहिवासी होती. तिच्या पश्चात आई-वडील आणि भाऊ असा परिवार असून, एका उमद्या तरुणीच्या अशा अकाली जाण्याने भडणे आणि शिंदखेडा गावावर शोककळा पसरली आहे..
नागरिकांमध्ये संतापाची लाट
मुख्य रस्त्यांवर भरधाव वाहने चालवली जातात आणि रहदारीच्या नियमांचे सर्रास उल्लंघन होते, त्यामुळेच अशा निष्पाप जिवांचा बळी जात आहे,” असा संताप नागरिकांनी व्यक्त केला आहे