मुंबईतील कल्याण पूर्व येथील 29 वर्षीय एअर होस्टेसने 28 डिसेंबर 2025 रोजी आपल्या राहत्या घरी गळफास लावून आत्महत्या केली होती. सुरुवातीला ही घटना केवळ एक आकस्मिक मृत्यू वाटत होती, परंतु कोळसेवाडी पोलिसांनी केलेल्या सखोल तपासानंतर या प्रकरणाला 10 जानेवारी रोजी वेगळं वळण लागलं आहे. पीडितेच्या आईने दिलेल्या तक्रारीवरून पोलिसांनी तिच्या 23 वर्षीय माजी प्रियकराविरुद्ध आत्महत्येस प्रवृत्त केल्याची तक्कार नोंदवली आहे. मृत तरुणीच्या मोबाईलमधील चॅट्स आणि आर्थिक व्यवहारांची तपासणी केल्यानंतर पोलिसांच्या हाती अनेक धक्कादायक पुरावे लागले आहेत.
लाखो रुपये उकळले, अन्…
पोलिसांनी दिलेल्या माहितीनुसार, तपासादरम्यान असं समोर आलं की, आरोपी आणि पीडिता गेल्या पाच वर्षांपासून एकमेकांच्या संपर्कात होते. आरोपीनं लग्नाचं आमिष दाखवून तिच्याकडून लाखो रुपये उकळले असून, शेवटचा व्यवहार 16 डिसेंबर 2025 रोजी झाला होता. इतकंच नाही तर, आरोपीने तिचे खासगी फोटो सार्वजनिक करण्याची धमकी देऊन तिला वारंवार मारहाण केल्याचंही चॅट्सवरून समोर आलं आहे. दुसऱ्या महिलेशी संबंध प्रस्थापित करून लग्नास नकार दिल्यानं ती प्रचंड मानसिक दडपणाखाली होती. या सर्व छळाला कंटाळून तिनं टोकाचं पाऊल उचलल्याचा आरोप तिच्या कुटुंबीयांनी केला आहे.
मानसिक आणि शारीरिक त्रास
तपासादरम्यान पीडितेच्या मोबाईलमधील चॅट्समधून अनेक धक्कादायक बाबी उघड झाल्या आहेत. आरोपीने तिचे काही खासगी फोटो सार्वजनिक करण्याची धमकी दिली होती आणि तो तिला वारंवार मारहाण देखील करत होता. तिच्या शरीरावरील मारहाणीच्या खुणा आणि चॅट रेकॉर्ड्सवरून तिला देण्यात आलेला मानसिक आणि शारीरिक त्रास स्पष्ट झाला आहे. या सातत्यपूर्ण छळाला कंटाळून अखेर तिने आपल्या राहत्या घरी टोकाचं पाऊल उचलल्याचं पोलिसांनी सांगितलं.
भररस्त्यात कारमध्ये 14 वर्षीय मुलीवर सामूहिक अत्याचार
रात्रीच्या अंधारात, भर रस्त्यावर चारचाकी वाहनात 14 वर्षांच्या अल्पवयीन मुलीवर सामूहिक अत्याचार झाल्याचा संतापजनक प्रकार मिरा-भाईंदर शहरात उघडकीस आला आहे. भांगेच्या गोळ्या आणि मद्य पाजून मुलीला बेशुद्ध करत, नराधमांनी तिच्यावर अत्याचार केला आहे. यापूर्वी पालिका मुख्यालयात अल्पवयीन कर्मचाऱ्यावर अत्याचाराचा प्रकार घडला होता. त्यानंतर आता भररस्त्यावरील या घटनेमुळे संपूर्ण शहर सुन्न झालं आहे.