तळकोकणात सिंधुदुर्ग जिल्ह्यात धक्कादायक घटना घडली असून आपल्या वृद्ध आईचा पोटच्या मुलानेच गोळी झाडून हत्या केल्याची धक्कादायक घटना घडली आहे. वेंगुर्ले तालुक्यातील अणसुरे या गावात ही घटना घडली आहे. उमेश वासुदेव सरमळकर नामक मुलाने आपल्या 65 वर्ष आईची हत्या केली आहे. ठासणीच्या बंदुकीने ही हत्या केली असून, मकर संक्रांतीच्या रात्री हा सगळा धक्कादायक प्रकार घडला आहे. मिळालेल्या प्राथमिक माहितीनुसार, दारूच्या व्यसन असलेल्या या 40 वर्षीय मुलानं आपल्या जन्मदात्या आईवरच गोळी झाडून ही हत्या केली आहे. वासंती वासुदेव सरमळकर असं या वृद्ध महिलेचं नाव आहे.
या घटनेची माहिती मिळताच वेंगुर्ला पोलीस ठाण्याच्या अधिकाऱ्यांनी घटनास्थळी धाव घेऊन पंचनामा केला आहे. संशयित आरोपी उमेश याला वेंगुर्ले पोलिसांनी ताब्यात घेतलं आहे. ही हत्या करण्यामागचं नेमकं कारण अद्याप समजलेलं नाही. मात्र, पुढील तपासात नेमकं कारण समोर येण्याची शक्यता आहे. उमेश हा दारूचा व्यसनी होता, त्याची मानसिक स्थितीही अनेकदा बिघडत असे, अशी प्राथमिक माहिती मिळाली आहे. या सगळ्या घटनेनं अवघा जिल्हा हादरला आहे. या सगळ्या घटनेचा तपास वेंगुर्ले पोलीस करत आहेत. दरम्यान, ओरस येथील फॉरेन्सिक टीम ही घटनास्थळी दाखल झाली आहे.
ताम्हिणी घाट प्रकरणात पुणे कनेक्शन?
रायगड जिल्ह्यातील ताम्हिणी घाट परिसरात पैशाच्या वादातून मित्रांनीच तरुणाची निर्घृण हत्या केल्याचा धक्कादायक प्रकरण उघडकीस आला असून, या हत्या प्रकरणातील मुख्य व फरारी आरोपीला अखेर पोलिसांनी रेल्वेतच शिताफीने अटक केली आहे. या घटनेमुळे संपूर्ण रायगड जिल्ह्यात खळबळ उडाली असून, मैत्रीच्या नात्याला काळीमा फासणारा हा प्रकार समाजाला हादरवणारा ठरला आहे.
पैशांचा वाद हत्येत बदलला
माणगाव पोलीस स्टेशन येथे गुन्हा रजिस्टर क्रमांक 17/2026 अन्वये भारतीय न्याय संहिता कलम 103 (1) व 3 (5) अंतर्गत गुन्हा दाखल करण्यात आला आहे. या प्रकरणातील मुख्य आरोपी सोन्या उर्फ प्रज्वल संतोष हंबीर (रा. खांदवेनगर, वाघोली, ता. हवेली, जि. पुणे) हा घटनेनंतर फरार झाला होता. पैशांच्या व्यवहारातून झालेल्या वादाचं रूपांतर हाणामारीत होऊन अखेर थेट हत्येत झालं, असं तपासात समोर आलं आहे. तर या प्रकरणात पुणे कनेक्शन देखील असल्याचं सांगण्यात येत आहे.