समाजाच्या रक्षणाची जबाबदारी ज्यांच्या खांद्यावर आहे, त्याच पोलीस दलातील एका कर्मचाऱ्याने एका तरुणीचा विश्वासघात केल्याची धक्कादायक घटना समोर आली आहे. लग्नाचे आमिष दाखवून एका २५ वर्षीय तरुणीवर वारंवार बलात्कार केल्याप्रकरणी महाराष्ट्र पोलीस दलातील एका शिपायाविरुद्ध अंभोरा पोलीस ठाण्यात गुन्हा दाखल करण्यात आला आहे. या घटनेमुळे संपूर्ण बीड जिल्ह्यात खळबळ उडाली असून पोलीस दलाची प्रतिमा मलीन झाली आहे.

मिळालेल्या माहितीनुसार, पीडित तरुणी आष्टी तालुक्यातील एका गावची रहिवासी आहे. आरोपी पोलीस शिपाई हा पीडितेच्या घराशेजारीच वस्तीवर वास्तव्यास होता. ओळखीचा फायदा घेत त्याने पीडितेचे आई-वडील घरी नसताना किंवा संधी मिळेल तेव्हा आरोपीने पीडितेच्या घरी जाऊन तिच्याशी वारंवार शरीर संबंध ठेवले आणि तिला लग्नाचे स्वप्न दाखवले. पीडितेचा विश्वास संपादन केल्यानंतर, त्याने तिला लग्नाचे ठाम आश्वासन दिले. लग्नाचे आमिष दाखवून त्याने दीर्घकाळ पीडितेचे लैंगिक शोषण केले. दरम्यानच्या काळात पीडितेने जेव्हा जेव्हा लग्नाबाबत विचारणा केली, तेव्हा तो काहीतरी कारण सांगून टाळाटाळ करत होता.

पीडितेसोबत विश्वासघात

काही दिवसांपूर्वी पीडितेने लग्नासाठी तगादा लावला असता, आरोपीने तिला स्पष्टपणे लग्नास नकार दिला. आपली फसवणूक झाल्याचे लक्षात येताच पीडित तरुणीने अन्यायाविरुद्ध आवाज उठवण्याचे ठरवले. तिने थेट अंभोरा पोलीगास ठाणे ठून आपली आपबिती सांगितली. पीडितेच्या तक्रारीवरून पोलिसांनी संबंधित पोलीस कर्मचाऱ्याविरुद्ध भारतीय दंड संहितेच्या संबंधित कलमान्वये बलात्काराचा गुन्हा दाखल केला आहे.
पोलीस कर्मचाऱ्यावरच गुन्हा दाखल झाल्याने पोलीस प्रशासनाने या प्रकरणाची गंभीर दखल घेतली आहे. या प्रकरणाचा पुढील तपास अंभोरा पोलीस ठाण्याचे सपोनि मंगेश साळवे हे करत आहेत. आरोपीने कर्तव्यावर असताना किंवा सुट्टीत असताना हे कृत्य केले, तसेच यात इतर काही बाबी आहेत का, याचा शोध पोलीस घेत आहेत. या घटनेमुळे पीडित तरुणीच्या कुटुंबाला मोठा मानसिक धक्का बसला असून, आरोपीवर कठोर कारवाई करण्याची मागणी परिसरातून होत आहे. रक्षकच भक्षक बनल्याने महिलांच्या सुरक्षिततेचा प्रश्न पुन्हा एकदा ऐरणीवर आला आहे.