राज्याच्या राजकारणात गेमचेंजर ठरलेली ‘मुख्यमंत्री माझी लाडकी बहीण योजना ‘ महापालिका निवडणुकीच्या तोंडावर पुन्हा एकदा वादाच्या केंद्रस्थानी आली आहे. डिसेंबर आणि जानेवारी महिन्याचा एकत्रित ३००० रुपयांचा हप्ता मकर संक्रांतीपूर्वी देण्याची तयारी महायुतीने केली असतानाच काँग्रेसने याला विरोध दर्शवला आहे. या सर्व गोंधळावर आता राज्याचे अर्थमंत्री आणि उपमुख्यमंत्री अजित पवार यांनी महत्त्वाची घोषणा केली आहे.
निवडणूक आयोगाचा निर्णय अंतिम: अजित पवार
काँग्रेसने निवडणूक आयोगाला पत्र लिहून लाडकी बहीण योजनेचा हप्ता १४ जानेवारीनंतर (निवडणुकीनंतर) देण्याची मागणी केली आहे. यावर भाष्य करताना अजित पवार म्हणाले, “आम्ही लाडक्या बहिणींना मकर संक्रांतीची भेट म्हणून हप्ता देण्याचे नियोजन केले आहे. मात्र, जर निवडणूक आयोगाने सूचना दिल्या किंवा हरकत घेतली, तर हा हप्ता १४ ऐवजी १६ तारखेला दिला जाईल. आम्ही नियमांचे पालन करू.” काँग्रेसने जरी आपण योजनेच्या विरोधात नसल्याचे म्हटले असले तरी, हप्ता लांबणीवर टाकण्याच्या मागणीमुळे राजकीय वातावरण तापले आहे.
युती धर्मावरून प्रत्युत्तर
महापालिका निवडणुकांच्या प्रचारात महायुतीमधील कुरबुरींवरही त्यांनी भाष्य केले. “मी महापालिका लढवत आहे आणि इथे झालेल्या चुका दाखवून दिल्या म्हणजे मी युती धर्म पाळला नाही असे होत नाही,” असे त्यांनी देवेंद्र फडणवीस यांना सुनावले.
तसेच मुख्यमंत्री एकनाथ शिंदे यांच्या ‘आता कंठ फुटला’ या विधानाचा समाचार घेताना पवार म्हणाले की, ९ वर्षे निवडणुकाच झाल्या नाहीत, तर कंठ कसा फुटणार?
‘जोपर्यंत देवाभाऊ मुख्यमंत्री, तोपर्यंत योजना सुरूच’
दरम्यान, नाशिकच्या सभेत देवेंद्र फडणवीस यांनी विरोधकांना कडक शब्दात उत्तर दिले. “जोपर्यंत देवाभाऊ मुख्यमंत्री आहे, तोपर्यंत लाडकी बहीण योजना कुणीही बंद करू शकणार नाही. ५० लाख महिला ‘लखपती दीदी’ झाल्या असून, हे उद्दिष्ट आता १ कोटींपर्यंत न्यायचे आहे,” असे आश्वासन त्यांनी दिले.
त्यामुळे आता लाडक्या बहिणींना पैसे नेमके कधी मिळतात याकडे सर्वांचं लक्ष लागलं आहे.