अलीकडे रस्ते अपघातांचं प्रमाण वाढलं आहे. रस्ते अपघातात आजवर अनेकजणांचे जीव गेले आहेत. अनेकांचे संसार उध्वस्त झाले आहेत. असाच एक दुर्दैवी अपघात कोल्हापूर पन्हाळा रोडवर झाला आहे. या अपघातात कोकणातील रत्नागिरी जिल्ह्यातील साखरपा येथील युवकाचा मृत्यू झाला आहे. विजय दिगंबर शिंदे उर्फ भाव्या शिंदे (वय 42) असं मृत्यू झालेल्या युवकाचं नाव आहे.
अचानक ट्रक पलटला, अन् सर्व संपलं…
संगमेश्वर तालुक्यातील साखरपा पत्कीवाडी येथील विजय दिगंबर शिंदे उर्फ भाव्या शिंदे यांचा 7 जानेवारी बुधवारी रात्री कोल्हापूर-पन्हाळा येथील पैजारवाडी येथे अपघाती मृत्यू झाला आहे. विजय उर्फ भाव्या शिंदे यांच्या अपघाती मृत्यूने साखरपा परिसरातून हळहळ व्यक्त केली जात आहे. पोलिसांकडून मिळालेल्या माहितीनुसार, विजय शिंदे हे बुधवारी रात्री आपल्या ताब्यातील लाकूड भरलेला सहाचाकी ट्रक (एमएच 17 बीवाय 1887) घेऊन कोल्हापूरच्या दिशेने जात होते. त्यावेळी पन्हाळा तालुक्यातील पैजारवाडी येथे ट्रकचा अपघात होऊन ट्रक पलटी झाला. या अपघातात विजय शिंदे यांचा जागीच मृत्यू झाला. हा अपघात रात्री 11 वाजण्याच्या सुमारास घडला. विजय शिंदे यांच्या मृत्यूची बातमी समजताच साखरपा परिसरात हळहळ व्यक्त करण्यात येत आहे. तर एक हरहुन्नरी व्यक्तिमत्व हरपल्याची भावना व्यक्त होत आहे.
कमवता हात काळानं हिरावला
विजय शिंदे हे ड्रायव्हर म्हणून काम करत असे. ड्रायव्हिंगचे काम करूनच ते आपल्या कुटुंबाचा उदरनिर्वाह करत होते. विजय शिंदे यांच्या मृत्यूने शिंदे कुटुंबावर दुःखाचा मोठा डोंगर कोसळला असून कमावता हातच दुर्दैवाने काळाने हिरावून घेतला आहे. विजय शिंदे यांच्या पश्चात आई, पत्नी आणि दोन लहान मुले असा परिवार आहे. या अपघाताची नोंद कोल्हापूर पन्हाळा परिसरातील पोलीस ठाण्यात करण्यात आली असून अधिक तपास पोलीस करत आहेत.
रत्नागिरी हळहळलं
अलीकडे युवा वर्गामध्येही आत्महत्या करण्याचे प्रमाण हे चिंताजनकरीत्या वाढलं आहे. अशीच एक दुर्दैवी घटना रत्नागिरी जिल्ह्यात दापोली तालुक्यात झाली आहे. दापोली तालुक्यातील एका तरुण विवाहित महिलेने विहिरीत उडी मारून स्वत:ला संपविल्याने मोठी खळबळ उडाली आहे. प्रिशा सुदेश वाडकर असं स्वत:ला संपविणाऱ्या महिलेचं नाव आहे. प्रिशा या 28 वर्षांच्या होत्या. त्या गिम्हवणे उगवतवाडी येथील रहिवासी होत्या. त्यांनी अचानक स्वत:ला संपवून घेतल्यामुळे एकच खळबळ उडाली आहे.