धावपळीच्या आयुष्यातून विरंगुळा म्हणून पर्यटनाला नागरिकांची पसंती वाढली आहे. याचा आधार घेऊन राज्य परिवहन महामंडळाने ‘ एसटी संगे पर्यटन ‘ उपक्रम सुरू केला. एप्रिल ते डिसेंबर, 2025 या कालावधीत राज्यभरात 5 हजार 207 बसगाड्या चालवून एसटीने सुमारे 23 कोटी 36 लाख रुपयांचे उत्पन्न मिळवले. राज्यात कोल्हापूर विभागाने सर्वाधिक सव्वाचार कोटींचा महसूल आणि सातारा विभागाने सर्वाधिक 773 सहली यशस्वीपणे हाताळल्या आहेत.
महिला सन्मान योजना आणि अमृत ज्येष्ठ नागरिक योजनेनुसार महिला व ज्येष्ठ नागरिकांना एसटी प्रवासात सवलत आहे. ही सवलत उपक्रमातही लागू आहे. किमान 40 किंवा त्यापेक्षा अधिक प्रवाशांचा गट करून एसटी आगारात संपर्क साधून सहज नवी बसगाडी प्रवासासाठी थेट दारात उपलब्ध होते. एप्रिल ते डिसेंबर 2025 या कालावधीत राज्यातील 31 विभागांतून 5 हजार 207 बसगाड्या चालवण्यात आल्या.
राज्यात सर्वाधिक महसूल कोल्हापूर विभागाने मिळवला आहे. कोल्हापूर विभागाने 681 सहलींचे आयोजन करत त्याप्रमाणे बसगाड्या चालवल्या. प्रत्येक गाडीला उदंड प्रतिसाद लाभल्याने एकूण 4 कोटी 19 लाख रुपयांची कमाई केली. सहकार, दुग्ध व्यवसाय आणि महिलांचे मजबूत आर्थिक पाठबळ यामुळे या योजनेला कोल्हापूरमध्ये मोठा प्रतिसाद मिळत असल्याचे चित्र आहे. सातारा विभागाने सर्वाधिक 773 बसगाड्या चालवल्या असून त्यांनी 2 कोटी 78 लाख रुपयांची कमाई केली आहे.
धार्मिक पर्यटनाला पसंती
‘एसटी संगे पर्यटन’ उपक्रमांतर्गत राज्यात पंढरपूर-तुळजापूर-अक्कलकोट, गाणगापूर, अष्टविनायक, अकरा मारुती दर्शन, गणपतीपुळे, ज्योतिर्लिंग यात्रा अशा सहलींचे आयोजन करण्यात आले आहे. राज्याबाहेर अयोध्या, सोमनाथ, श्रीशैलम्, रामोजी फिल्मसिटी अशा सहलींचा पर्याय पर्यटकांना देण्यात आला आहे.
एसटीच्या ताफ्यात नव्या बसगाड्या दाखल होत आहेत. सहलींसाठी अशा गाड्या प्राधान्याने देण्यात येतात. खासगी सहलींच्या तुलनेत एसटीची स्वस्त आणि थेट सुविधा पर्यटकांच्या पसंतीस पडल्या आहेत. सुरक्षित प्रवासासाठी एसटी महामंडळाची विश्वासार्हताही सहलींच्या संख्येत वाढ होण्यास फायदेशीर ठरत आहे, असे एसटी महामंडळातील अधिकाऱ्यांनी सांगितले.