तीन वर्षांपासून लिव्ह-इन रिलेशनशिपमध्ये राहणाऱ्या दोन युवकांपैकी एकाने दुसऱ्याची हत्या केल्याचा धक्कादायक प्रकार अकोल्यातून समोर आला आहे. अविश्वास आणि नात्यात फसवणूक केल्याच्या संशयातून झालेल्या वादामधून ही घटना घडली. पोलिसांनी आरोपीला अटक केली असून पुढील तपास सुरु आहे.
काय आहे प्रकरण?
ही घटना अकोला शहरातील मोठी उमरी परिसरातील संजय नगर येथे घडली. अमोल दिगंबर पवार आणि नितेश अरुण जंजाळ या दोघांमध्ये समलिंगी संबंध सुरु होते. गेल्या तीन वर्षांपासून ते लिव्ह-इन रिलेशनशिपमध्ये एकत्र राहत होते.
सुरुवातीला दोघांचंही नातं प्रेमाने भरलेलं होते. एकत्र राहत असताना घरातील कामांची वाटणी करत होते आणि एकमेकांना साथही देत होते. मात्र गेल्या काही महिन्यांपासून त्यांच्या नात्यात तणाव निर्माण झाला होता. नितेशला संशय होता की अमोलचे इतर कोणाशी तरी शरीरसंबंध आहेत.
या संशयामुळे दोघांमध्ये वारंवार खटके उडू लागले. हे वाद वाढत गेले आणि अखेर एका घटनेने गंभीर वळण घेतले. घटनेच्या रात्री नितेश अमोलसाठी बाहेरुन जेवण घेऊन आला होता. मात्र जेवणानंतर त्यांच्यात पुन्हा वाद सुरू झाला. रागाच्या भरात नितेशने अमोलवर लाठी आणि लाकडी दांड्याने हल्ला केला. या हल्ल्यात अमोलच्या डोक्याला आणि चेहऱ्याला गंभीर दुखापत झाली. या हल्ल्यात अमोलचा जागीच मृत्यू झाला.
अमोलचा पडून मृत्यू, नितेशचा बनाव
दुसऱ्या दिवशी सकाळी नितेश घरातून बाहेर येऊन ओरडू लागला की अमोल पडला आणि त्याचा मृत्यू झाला. त्याच्या ओरडण्याने आजूबाजूचे लोक जमा झाले. त्यानंतर तात्काळ पोलिसांना माहिती देण्यात आली. सिव्हिल लाईन पोलीस घटनास्थळी दाखल झाले आणि त्यांनी तपास सुरू केला. पोलिसांनी घटनास्थळाची पाहणी केली असता अमोलच्या शरीरावर गंभीर जखमांच्या खुणा आढळून आल्या.
प्राथमिक तपासात डोक्यावर आणि चेहऱ्यावर झालेल्या जखमांमुळेच मृत्यू झाल्याचे स्पष्ट झाले. पोलिसांनी नितेशकडे चौकशी सुरु केली, मात्र तो आधी उडवाउडवीची उत्तरं देत होता. अखेर पोलिसांनी खाक्या दाखवताच त्याने आपला गुन्हा कबूल केला. पोलिसांनी अमोलचा मृतदेह ताब्यात घेऊन पोस्टमार्टमसाठी रुग्णालयात पाठवला.
पोलिसांनी दिलेल्या माहितीनुसार, अमोल आणि नितेश हे दोघे मोठी उमरी परिसरातील संजय नगरमध्ये गेल्या तीन वर्षांपासून लिव्ह-इन रिलेशनशिपमध्ये राहत होते. त्यांचे संबंध समलैंगिक होते. मात्र नितेशला अमोलच्या चारित्र्यावर संशय असल्याने त्याने भांडणानंतर रागाच्या भरात अमोलचा जीव घेतला. या घटनेमुळे परिसरात खळबळ उडाली आहे.