अकोला शहरात पुन्हा एक धक्कादायक घटना समोर आली असून सिव्हिल लाईन पोलीस स्टेशनच्या हद्दीतील संजय नगर परिसरात एका 35 वर्षीय युवकाची हत्या करण्यात आली आहे. अमोल दिगंबर पवार असं हत्या झालेल्या व्यक्तीचं नाव आहे. हत्या झाल्यानं शहरात खळबळ उडाली आहे. विशेष म्हणजे अवघ्या 48 तासांत एकाच पोलीस स्टेशनच्या हद्दीत घडलेली ही दुसरं हत्याकांड आहे. या प्रकरणातील आरोपी नितेश अरुण जंजाळ याला पोलिसांनी ताब्यात घेतलं आहे.
याआधी नववर्षाच्या पूर्वसंध्येला म्हणजे 31 डिसेंबर 2025 रोजी कृषी नगर परिसरात तंबाखूच्या वादातून झालेल्या हाणामारीत एका इसमाची हत्या झाली होती. त्या घटनेनंतर पुन्हा एक गंभीर गुन्हा घडल्यानं नागरिकांमध्ये भीतीचं वातावरण आहे. घटनेची माहिती मिळताच पोलीस घटनास्थळी दाखल झाले असून पंचनामा करून मृतदेह शवविच्छेदनासाठी जिल्हा सामान्य रुग्णालयात पाठवण्यात आला आहे. हत्या नेमकी कोणत्या कारणातून झाली याचा पुढील तपास सिव्हिल लाईन पोलीस करीत आहे.
नेमकं काय घडलं?
2 जानेवारी 2026च्या सकाळी अंदाजे आठ वाजताच्या सुमारास मोठी उमरी परिसरातील संजय नगर येथे एक गंभीर घटना घडल्याची माहिती समोर आली आहे. अमोल दिगंबर पवार (वय 35) हा तरुण मृतावस्थेत असल्याची माहिती सिव्हिल लाईन पोलीस ठाण्याला माहिती मिळाल्यानंतर पोलिसांनी तात्काळ घटनास्थळी धाव घेतली. पोलिसांनी केलेल्या प्राथमिक तपासात अमोल दिगंबर पवार याला नितेश जंजाळ याने मारहाण केल्याचं निष्पन्न झालं. या मारहाणीत अमोल पवार याचा मृत्यू झाल्याचं समोर आलं आहे.
घटनेनंतर परिसरात एकच खळबळ उडाली असून नागरिकांमध्ये भीतीचे वातावरण पसरले आहे. या प्रकरणी सिव्हिल लाईन पोलीस ठाण्यात गुन्हा दाखल करण्याची प्रक्रिया सुरू आहे. आरोपी नितेश जंजाळ याच्या विरोधात कायदेशीर कारवाई करण्यात येत आहे. आरोपीला अर्धा तासाच्या आत पोलिसांनी अटक केली आहे. मृतदेह उत्तरीय तपासणीसाठी शासकीय रुग्णालयात पाठवण्यात आला असून, मृत्यूचं नेमकं कारण अहवालानंतर स्पष्ट होणार आहे. मात्र, हे दोघेही चांगले मित्र होते, आणि यांच्यात किरकोळ वादातून भांडणं होऊन वाद विकोपाला गेला आणि वादाचे पर्यवसान हाणामारीत झालं. या हाणामारीत अमोलला गंभीर दुखापत झाली आणि त्याचा मृत्यू झाला.