बोदवड (ता. सिल्लोड) येथील भुसार व्यापाऱ्याचे अपहरण करून खून करून त्यांचा मृतदेह चाळीसगाव-कन्नड रस्त्यावरील घाटात खोल दरीत फेकून देऊन पुरावा नष्ट करण्याचा प्रयत्न केल्याची घटना रविवारी रात्री नऊ वाजता घडली. सोमवारी पहाटे चार वाजता हा प्रकार उघडकीस आला.
अजिंठा पोलिसांनी या प्रकरणी पाच आरोपींना रविवारी रात्री ११ वाजेच्या सुमारास छत्रपती संभाजीनगर येथील समृद्धी महामार्गावरील टोल नाक्यावर अटक केली.तुकाराम माधवराव गव्हाणे (वय ५५, रा. बोदवड, ता. सिल्लोड) असे खून झालेल्या व्यापाऱ्याचे नाव आहे. या प्रकरणी मृताचे काका उत्तमराव गव्हाणे यांनी दिलेल्या फिर्यादीवरून वरून अजिंठा पोलिसांनी सोमवारी आरोपी सचिन नारायण बनकर (वय २५) , वैभव समाधान रानगोते (वय २३, दोघेही रा. गोळेगाव), अजिनाथ उर्फ अजय रखमाजी सपकाळ (वय २२, रा. पालोद), विशाल साहेबराव खरात (वय २३, रा. पानवडोद), दीपक कन्हैयालाल जाधव (वय २५, रा. लिहाखेडी) या पाच जणांविरोधात गुन्हा दाखल केला आहे.
नेमका काय प्रकार?
आरोपींनी तुकाराम गव्हाणे यांचे २७ डिसेंबरला सायंकाळी ७.३० वाजता उंडणगाव ते बोदवड रस्त्यावर दुचाकी अडवून एक लाख रुपये लुटले होते. चाकूचा धाक दाखवून आरोपींनी गव्हाणे यांना एका कारमध्ये बळजबरी बसवून अपहरण केले होते. त्यांचा मुलगा कृष्णा व काका उत्तमराव गव्हाणे यांच्याकडे आरोपींनी गव्हाणे यांच्या फोनवरून संपर्क साधून एक कोटी रुपयांची खंडणी मागितली होती.
मृतदेह खोल दरीत फेकला
खंडणी रविवारी दुपारी तीन वाजेपर्यंत छत्रपती संभाजी नगर येथील मध्यवर्ती बस्थानक व नंतर बाबा पेट्रोल पंपाजवळ ठिकाण बदलून आणून देण्याची मागणी करण्यात आली होती. पैशांची जुळवाजुळव करण्यास वेळ झाल्याने तीन वाजेच्या आत खंडणी मिळाली नाही. त्यामुळे आरोपींनी रविवारी रात्री नऊच्या सुमारास चाळीसगाव घाटात तुकाराम गव्हाणे यांचा खून करून, मृतदेह खोल दरीत फेकून दिला.