देशातील आघाडीची खासगी विमान कंपनी असणाऱ्या इंडिगोची विमान उड्डाणे रद्द होण्याचे सत्र अद्याप कायम आहे. इंडिगोची एकूण 80 विमान उड्डाणे सोमवारी रद्द करण्यात आली. यातील निम्मी उड्डाणे ही दिल्ली विमानतळावरून नियोजित होती. ही उड्डाणे खराब हवामानामुळे रद्द करण्यात आल्याची माहिती इंडिगोतर्फे प्रवाशांना एका विशेष सूचनावलीद्वारे देण्यात आली.
इंडिगोच्या वेबसाइटवर उड्डाणं रद्द झाल्याची माहिती
‘दिल्लीव्यतिरिक्त मुंबई, बेंगळुरू, कोचिन, हैदराबाद, कोलकाता, अमृतसर, चंडिगड, जयपूर, देहराडून, इंदूर, पाटणा, भोपाळ आदी विमानतळांवरील नियोजित उड्डाणे रद्द करण्यात आली’, असे इंडिगोच्या वेबसाइटवर नमूद करण्यात आले आहे. सोमवारी सकाळी 11 वाजून 20 मिनिटांनी इंडिगोने प्रवाशांसाठी एक सूचनावली प्रसृत केली.
शहरात धुक्याची चादर
‘दिल्लीसह उत्तर भारतातील अनेक विमानतळांवर सोमवारी सकाळी धुके पसरले होते. धुक्यामुळे दृश्यमानता खालावल्याने सकाळच्या सत्रातील काही उड्डाणे रद्द करण्यात आली. दुपारपर्यंत या धुक्याचा प्रभाव कायम रहाण्याची शक्यता असून दुपारनंतरही काही उड्डाणे रद्द होऊ शकतील, अथवा काही उड्डाणे विलंबाने होतील’, असे यात म्हटले होते.
एकूण 128 सेवा रद्द
दिल्ली विमानतळावरील एकूण 128 विमानसेवा सोमवारी धुक्यामुळे रद्द करण्यात आल्या. यामध्ये या विमानतळावर येणाऱ्या व तेथून उड्डाण करणाऱ्या प्रत्येकी 64 सेवांचा समावेश होता. याशिवाय, दोनशे उड्डाणे विलंबाने रवाना झाली व आठ विमानांचा मार्ग वळवण्यात आला, अशी माहिती विमानतळ व्यवस्थापनाने दिली. उशिरा मार्गस्थ झालेल्या उड्डाणांचा सरासरी विलंब कालावधी 24 मिनिटांचा होता. दिल्ली आंतरराष्ट्रीय विमानतळ लिमिटेडतर्फे इंदिरा गांधी आंतरराष्ट्रीय विमानतळाचे व्यवस्थापन पाहिले जाते. या विमानतळावरून दररोज सुमारे तेराशे विमानसेवा हाताळल्या जातात.