सरकारी नोकरीचे स्वप्न पाहणाऱ्या तरुणांना आणि त्यांच्या पालकांना लक्ष्य करून फसवणूक करणाऱ्या टोळ्या सक्रिय असल्याचे पुन्हा एकदा समोर आले आहे. मुलीला मंत्रालयात लिपिक पदावर नोकरी लावून देतो, असे आमिष दाखवून बीडमधील एका व्यक्तीची तब्बल १० लाख रुपयांची फसवणूक करण्यात आली आहे. याप्रकरणी सोलापूर जिल्ह्यातील एका विरुद्ध पेठ बीड पोलीस ठाण्यात गुन्हा दाखल करण्यात आला असून पोलीस अधिक तपास करत आहेत.

मिळालेल्या माहितीनुसार, सुनील लक्ष्मण यादव (वय ४७, रा. हनुमाननगर, एमआयडीसी, बीड) हे बीड शहरात वास्तव्यास आहेत. काही वर्षांपूर्वी त्यांची ओळख विलास मधुकर येलपल्ले (रा. अजनाळे, जि. सोलापूर) याच्याशी झाली होती. या ओळखीचा फायदा घेत विलासने यादव यांचा विश्वास संपादन केला. विलास येलपल्ले हा सुनील यादव यांच्या घरी आला होता. यावेळी बोलता-बोलता त्याने ‘माझे मंत्रालयातील बड्या अधिकाऱ्यांशी जवळचे संबंध आहेत, मी तुमच्या मुलीला मंत्रालयात लिपिक पदावर कायमस्वरूपी सरकारी नोकरी लावून देऊ शकतो, असे आमिष दाखवले.

१२ लाखांत ठरला सौदा

सुरुवातीला विलासने या कामासाठी १४ लाख रुपयांची मागणी केली होती. मात्र, दोन्ही बाजूंनी चर्चा झाल्यानंतर हा व्यवहार १२ लाख रुपयांमध्ये निश्चित झाला. आपल्या मुलीचे भविष्य उज्ज्वल होईल या आशेने सुनील यादव यांनी विलासवर विश्वास ठेवून त्याला वेळोवेळी एकूण १२ लाख रुपये दिले. मात्र, पैसे घेऊन बरेच महिने उलटल्यानंतरही नोकरीचे नियुक्ती पत्र मिळाले नाही.

फसवणुकीनंतर पोलिसात धाव

नोकरी संदर्भात वारंवार विचारणा करूनही विलास टाळाटाळ करू लागला. जेव्हा सुनील यादव यांनी आपले दिलेले पैसे परत मागण्यास सुरुवात केली, तेव्हा विलासने त्यातील २ लाख रुपये परत केले. मात्र, उर्वरित १० लाख रुपये देण्यास त्याने नकार दिला आणि हात झटकले. आपली फसवणूक झाल्याचे लक्षात येताच सुनील यादव यांनी पेठ बीड पोलीस ठाणे गाठून तक्रार दिली.

पेठ बीड ठाण्यात फसवणुकीचा गुन्हा

सुनील यादव यांच्या फिर्यादीवरून पेठ बीड पोलिसांनी विलास मधुकर येलपल्ले याच्याविरुद्ध फसवणुकीचा गुन्हा दाखल केला आहे.मंत्रालयातील नोकरीच्या नावाखाली अशा प्रकारे आणखी कोणाची फसवणूक झाली आहे का, याचाही शोध पोलीस घेत आहेत. या प्रकरणाचा पुढील तपास पेठ बीड पोलीस करत आहेत.