पबमध्ये नाचत असताना तरुणीशी अश्लील चाळे केल्यामुळे झालेल्या भांडणातून दोन गटांत वाद झाला. यातून भररस्त्यात दोन तरुणांवर दगड, सळई आणि चाकूने हल्ला करण्यात आला. यात एकाचा मृत्यू झाला तर एक गंभीररीत्या जखमी झाला. ही घटना नागपुरातील विमानतळ चौकातील दाबो पबसमोरील रस्त्यावर शुक्रवारी पहाटे चार वाजताच्या सुमारास घडली. प्रणय नरेश नन्नावरे (वय २८ वर्षे, रा. महाल) असे मृत व्यक्तीचे तर गौरव ब्रीजलाल कारडा (३२, चिखली, कळमना) असे जखमीचे नाव आहे.
काय घडलं नेमकं?
पोलिसांकडून प्राप्त झालेल्या माहितीनुसार, मृत प्रणय हा शेअर मार्केटचा व्यवसाय करतो. तर गौरव एका सीएकडे नोकरी करीत होता. या दोघांनी एका तरुणीला मुंबईवरुन पार्टीसाठी बोलाविले होते. ही तरुणी दोन दिवसांपासून नागपुरात आहे. गुरुवारी रात्री दहा वाजता हे तिघे विमानतळ परिसरातील दाबो या पबमध्ये गेले. मध्यरात्रीनंतर हे तिघे नृत्य करीत असल्याचे कळते.
यावेळी पाच जणांचा एक गट या पबमध्ये दाखल झाला. हे पाचही जण दारुच्या नशेत असल्याची माहिती आहे. यातील एक जण व या प्रकरणातील मुख्य आरोपी मेहुल रहाटे आणि हनी उर्फ तुषार अनिल नानकानी (रा. कामठी) हे दोघांनी दारुच्या नशेत तरुणीशी अश्लील चाळे करू लागले. प्रणयने त्यांना विरोध केला. यावरून त्यांच्यात वाद झाला. वादाचे रुपांतरण हाणामारीत होत असल्याचे लक्षात येताच पबच्या व्यवस्थापकांनी या दोन्ही गटांना पबबाहेर काढले.
भरचौकात केला हल्ला
गौरव आणि प्रणय यांच्यासोबत असलेल्या तरुणीशी चाळे केल्यामुळे दोघांनी रागाच्या भरात मेहुल आणि हनी यांना मारहाण केली. मेहुल आणि हनी यांनी त्यांच्या कारकडे धाव घेतली. ते कारमधून शस्त्र घेऊन आले. मेहूल व हनी या दोघांनी प्रणय व गौरववर चाकू, सळई अशा तिक्ष्ण शस्त्रांनी हल्ला केला. यात दोघेही जखमी झाले. यात प्रणयचा तर जागीच मृत्यू झाला. गौरवच्या बरगड्यांना मार लागला असून त्याच्यावर एका खासगी रुग्णालयात उपचार सुरू आहेत.
घटनेची माहिती मिळताच सोनेगाव पोलिसांनी घटनास्थळी धाव घेतली. खुनाचा गुन्हा दाखल करून काहीच पाच पैकी दोन आरोपींना ताब्यात घेतले. अन्य तीन आरोपींचा शोध सुरू आहे.