पाटणसावंगीतील एनजे फार्म्समधील बॅचलर्स पार्टीदरम्यान आदित्य गजानन मोहिते (रा. मनीषनगर) याच्या मृत्यूप्रकरणी खापा पोलिसांनी त्याच्या ११ मित्रांविरुद्ध निष्काळजीपणे मृत्यूस कारणीभूत असल्याचा गुन्हा दाखल केला. जोएल ऊर्फ जुवेल सिंग, पंकज निकस, अभय धाबर्डे, रवी फुकटे, पराग धांडे, प्रज्ज्वल सहारे, रोशन रणदिवे, आकाश बागुल, हटसन मिसाळ, रिचर्ड साखरपेकर व निरंजन चितपल्लीवार, अशी गुन्हा दाखल करण्यात आलेल्यांची नावे आहेत. अॅड. परिक्षित गजानन मोहिते (वय ३८) यांनी दिलेल्या तक्रारीवरून हा गुन्हा दाखल करण्यात आला.
पाटणसावंगीतील जे फार्म्समधील बॅचलर्स पार्टीदरम्यान आदित्य गजानन मोहिते या युवकाचा संशयास्पद मृत्यू झाला. आदित्यच्या मृत्यूमागे घातपात व निष्काळजीपणा असल्याचा आरोप त्याची आई प्रज्ञा यांनी केला होता. याबाबत पोलिस अधीक्षक हर्ष पोद्दार यांच्याकडे त्यांनी तक्रार दाखल केली होती.
नेमकं काय घडलं?
आदित्यचा मित्र जुवेल याने फार्म हाऊसमध्ये बॅचलर पार्टी दिली. १५ नोव्हेंबरला जुवेल, आदित्य, डॉक्टर मित्र व अन्य तेथे गेले. यादरम्यान रात्री आदित्यला उलट्या झाल्या. जुवेल व त्याच्या साथीदारांनी आदित्यच्या प्रकृतीकडे दुर्लक्ष केले. डॉक्टर मित्रांनीही त्याला तपासले नाही. त्याला खोलीत नेले.
दुसऱ्या दिवशी सकाळी एक मित्र आदित्यच्या खोलीत गेला. त्याला जागविण्याचा प्रयत्न केला; मात्र, तो जागा झाला नाही. त्याने आदित्यचा भाऊ अॅड. परीक्षित यांना माहिती दिली. त्याच्या मित्रांनी आदित्यला कोराडी मार्गावरील खासगी हॉस्पिटलमध्ये दाखल केले. डॉक्टरांनी तपासून आदित्यला मृत घोषित केले. परीक्षित यांनी पोलिसांत तक्रार केली. तपासानंतर पोलिसांनी ११ जणांविरुद्ध गुन्हा दाखल केला.
कुटुंबातील चौघांचा संशयास्पद मृत्यू
दुसरीकडे, नांदेड जिल्ह्यातील मुदखेड तालुक्यातील जवळा (मुर्हार) येथे एका शेतकरी कुटुंबातील पती-पत्नी आणि त्यांच्या दोन तरुण मुलांचे मृतदेह गुरुवारी सकाळी वेगवेगळ्या ठिकाणी आढळून आले. या प्रकारामुळे गाव हादरले असून पोलिसांनी तपास सुरू केला आहे.
रमेश होनाजी लखे (वय ५१), पत्नी राधाबाई (४४) यांचे मृतदेह गावातील घरात आढळले. मुलगे उमेश (वय २५) आणि बजरंग (वय २२) हे मुदखेडजवळच्या मुगट रेल्वेस्थानकाजवळ लोहमार्गावर मृतावस्थेत आढळून आले. वरिष्ठ अधिकाऱ्यांसह मुदखेड व बारड पोलिस ठाण्यांच्या कर्मचाऱ्यांनी तपास सुरू केला आहे.
लखे कुटुंबाची आर्थिक स्थिती अतिशय सामान्य होती. त्यांना चार एकर जमीन होती. रमेश हे हृदयरोगी होती. अलीकडे त्यांच्यावर नांदेडच्या एका रुग्णालयात उपचार झाल्याचे चौकशीत उघड झाले. पोलिस अधीक्षक अबिनाशकुमार यांनीही घटनास्थळी भेट दिली.