स्वतःच्या मुलीवर चाकूचा धाक दाखवून वारंवार बलात्कार करून तिच्यावर अमानुष अत्याचार करणाऱ्या एका क्रूर पित्याला विशेष पोक्सो न्यायालयाने नुकतीच मरेपर्यंत जन्मठेपेची शिक्षा सुनावली आहे. आरोपीने केलेले कृत्य अत्यंत घृणास्पद असून, त्याने बाप-मुलीच्या पवित्र नात्याला कलंक लावला आहे. विशेष म्हणजे, मुलगी एका गंभीर आणि जीवघेण्या आजाराने त्रस्त असतानाही पित्याने तिच्यावर लैंगिक अत्याचार केले, असे गंभीर निरीक्षण न्यायालयाने आपल्या निर्णयात नोंदवलं आहे.
मिळालेल्या माहितीनुसार, मुंबईतील रे रोड येथील झोपडपट्टीत राहणारी ही मुलगी पुण्यातील एका निवासी शाळेत शिकत होती. तिला एचआयव्ही संसर्ग झाला होता. तिच्या आईचे निधन झाल्यानंतर पित्याने तिला मुंबईत आणले आणि घरात सुरीचा धाक दाखवून तिच्यावर अनेकदा बलात्कार केला. मुलीच्या एकटेपणाचा गैरफायदा घेऊन पित्याने आपली वासना पूर्ण केली. माणुसकीला काळीमा फासणाऱ्या या घटनेप्रकरणी न्यायालयाने आरोपीला कठोर शिक्षा सुनावली आहे. पीडितेने सहन केलेला मानसिक छळ शब्दांत व्यक्त करणे अशक्य आहे. केवळ आरोपीला शिक्षा देण्यासाठीच नव्हे, तर अशा प्रकारचे घृणास्पद कृत्य करण्याचा विचार करणाऱ्या इतर संभाव्य गुन्हेगारांच्या मनात भीती निर्माण करण्यासाठी जास्तीत जास्त शिक्षा देणे आवश्यक आहे, असं न्यायाधीशांनी आपल्या निर्णयात म्हटले आहे.
दरम्यान, न्यायालयाने आरोपीला ठोठावलेली मरेपर्यंत जन्मठेपेची शिक्षा ही आरोपीने केलेल्या गुन्ह्याच्या गांभीर्याला अधोरेखित करते. न्यायालयानं नमूद केले की, “आरोपीने केलेले कृत्य निश्चितपणे अत्यंत घृणास्पद आहे. बाप आणि मुलीच्या पवित्र नात्यालाच त्याने कलंक लावला आहे. सर्वात वेदनादायक बाब म्हणजे, मुलगी एका संसर्गजन्य आणि जीवघेण्या आजाराने त्रस्त असतानाही आरोपीने तिच्यावर लैंगिक अत्याचार केले.”