पाच वर्षांच्या मुलीचे अपहरण करून मामा आणि मामीने तिची केवळ 90 हजार रुपयांत विक्री केल्याची घटना पोलिसांनी सांताक्रूझच्या वाकोला येथून उघडकीस आणली आहे. पोलिसांनी मामा आणि मामी अटक केल्यानंतर पुढील साखळी उजेडात आणली. मामाकडून घेतलेल्या या मुलीला आणखी काही जणांनी दोन महिलांना एक लाख 80 हजार रुपयांना विकले. पोलिसांनी पाच जणांना अटक केली असून आरोपींची संख्या वाढण्याची शक्यता आहे.
वाकोला येथे राहणारी पाच वर्षांची रूपा (बदललेले नाव) घराजवळून बेपत्ता झाल्याची तक्रार 22 नोव्हेंबर रोजी तिच्या पालकांनी केली. मुलगी लहान असल्याने वाकोला पोलिसांनी अपहरणाचा गुन्हा दाखल केला. लहान मुलीचे अपहरण झाल्याचा गुन्हा असल्याने पोलिस उपायुक्त मनीष कलवानिया यांनी तपासासाठी पोलिसांची सात पथके तयार करून त्यांच्याकडे वेगवेगळ्या जबाबदाऱ्या दिल्या. तपास पथकांनी सलग दोन दिवस रात्र तांत्रिक तपास व गोपनीय माहिती आधारे तपास केला आणि एका संशयित रिक्षाचे वर्णन मिळवले. ही रिक्षा सांताक्रूझ येथून पनवेल येथे गेली आणि परत आल्याचे कळले. रिक्षाचा क्रमांक न मिळाल्याने केवळ वर्णनावरून सांताक्रूझ पूर्वेकडून चालक लतीफ अब्दुल माजिद शेख याला आणि रिक्षा ताब्यात घेतले. लतीफ याने रूपाचा मामा लॉरेन्स निकलेस फर्नांडिस आणि मामी मंगल यांनीच अपहरण केल्याची माहिती दिली. पनवेल येथे राहणारा रूपाचा मामा लॉरेन्स आणि मामी मंगल यांना पोलिसांनी ताब्यात घेऊन त्यांची कसून चौकशी केली असता त्यांनी ओळखीचा तरुण करण मारुती सणस याला ९० हजार रुपयांना रूपाची विक्री केली.
दुप्पट किमतीला पुन्हा विकले
लॉरेन्स व मंगल यांनी सांगितलेल्या करणला पोलिसांनी पनवेलच्या उसर्ली बुद्रुक येथून शोधून काढले. त्याने चौकशीमध्ये आणखी दोन महिलांची नावे सांगितली. आपण रूपा हिला एक लाख ९० हजारांना वृंदा विनेश चव्हाण आणि अंजली अजित कोरगावकर या दोघींना विकल्याची माहिती दिली. पोलिसांनी तत्काळ कारवाई करीत वृंदाला शोधून काढले व तिच्या तावडीतून रूपाची सुखरूप सुटका करत तिला सांताक्रूझ येथील घरी आणून आईच्या स्वाधीन केले. पोलिसांनी लॉरेन्स, मंगल, लतीफ, करण आणि वृंदा यांना अटक केली असून अंजलीचा शोध सुरू आहे.