तुळजापूरमधल्या ड्रग्स प्रकरणातील आरोपी पिंटू गंगणे यांना तुळजापूर नगरपालिका निवडणुकीमध्ये भाजपने नगराध्यक्ष पदासाठी उमेदवार जाहीर केले आहे. भाजपचे जिल्हाध्यक्ष दत्ता कुलकर्णी यांनी ही माहिती दिली आहे. याप्रकरणी भाजप पक्षाची बदनामी होत असतानाही गंगणे यांच्या नावाला पक्षाने दिलेली मान्यता अनेकांना रुचलेली नाही.
ड्रग्स प्रकरणात पिंटू गंगणे यांनी पोलिसांना मदत केल्याचा दावा भाजपच्यावतीने केला जातोय. तुळजापूर मतदारसंघाचे आमदार राणा जगजीतसिंह पाटील हे आहेत. या प्रकरणात आरोपीस राजाश्रय मिळत असल्याचा आरोपही विरोधकांनी केलेला आहे.
तुळजापूर ड्रग्स प्रकरणातील आरोपीला राजश्री मिळत असल्याबाबतचे पत्र खासदार सुप्रिया सुळे यांनी मुख्यमंत्री देवेंद्र फडणवीस यांना पाठवले होते. मात्र पत्रात निर्देशित केलेले आरोपी पिंटू गंगणे नाहीत, असे यावेळी सांगण्यात येत आहे.गेल्या अनेक वर्षांपासून तुळजापूर नगरपालिकेत पिंटू गंगणे यांची मोठी ताकद मानली जाते. त्यांच्यावर यापूर्वीही अवैध धंद्यांच्या अनुषंगाने गुन्हे दाखल झालेले आहेत, अशा व्यक्तीला भाजपने उमेदवारी दिल्याने विरोधकांकडून टीका होत आहे.
दरम्यान, भाजपचे जिल्हाध्यक्ष कुलकर्णी यांना याबाबत विचारले असता ते म्हणाले की, आम्ही भाजपकडून अधिकृत उमेदवार म्हणून एबी फॉर्म पिंटू गंगणे यांना दिलाय. ते या ड्रग्स प्रकरणामध्ये नव्हते. तर त्यांनी ड्रग्स सेवन केल्याचा पोलिसांचा आरोप आहे. त्यांच्यामुळेच पोलिसांना या प्रकरणाची माहिती मिळत आहे आणि त्यामध्ये ते पोलिसांना मदत करत आहेत.
नेमकं काय घडलं होतं?
तुळजापूर मध्ये 40 ग्रॅम ड्रग सापडले होते. त्यानंतर राज्यामध्ये एकच खळबळ उडाली होती. मतदार संघाचे आमदार राणा जगजीतसिंह पाटील हे ड्रग्स प्रकरणातील आरोपींना राजाश्रय देत असल्याचा आरोप विरोधकांनी केला. मात्र, असं असलं तरीही तुळजापूर नगरपालिकेत भाजपने अधिकृत उमेदवार म्हणून पिंटू गंगणे यांनाच जाहीर केले आहे. अमलीमली पदार्थांची तस्करी वेगळी आणि त्याचे सेवन वेगळे, अशा पद्धतीचा दावा भाजपकडून केला गेला.
आणखी एक धक्कादायक बाब म्हणजे अर्ज दाखल करणाऱ्यांमध्ये ड्रग्स प्रकरणात सहभागी असलेले सर्व पक्षीय आरोपी कार्यकर्ते असल्याचा दावाही होतो आहे. यामधील संतोष परमेश्वर हे माजी नगराध्यक्ष असून एवढे दिवस ते शरद पवारांच्या राष्ट्रवादीमध्ये होते. आता ते भाजपमध्ये सामील झाले आहे. शिवसेना, भाजप, शिवसेना उद्धव ठाकरे तसेच काँग्रेस पक्षातून उमेदवारी अर्ज दाखल करणारे अनेक जण अमली पदार्थ प्रकरणात आरोपी होते. त्यामुळे तुळजापूर नगरपालिका निवडणुकीत अमली पदार्थ प्रकरणातील आरोपीच उमेदवार असल्याचे चित्र दिसून येत आहे.