शिर्डी येथे श्रीसाईबाबा दर्शनासाठी फॉर्च्युनर वाहनाने जाणाऱ्या सुरत (गुजरात) येथील भाविकांच्या वाहनाला एरंडगाव शिवारात नाशिक महामार्गावर अपघात झाला. यात तिघांचा जागीच मृत्यू झाला, तर चौघे गंभीर जखमी झाले आहेत.
मृतांमध्ये प्रणव अनुरभाई देसाई (वय ४०), पलक अजयभाई कपाडिया (वय ३५), सुरेशचंद्र कबीराज साहू (वय ३५) (वय ३५, सर्व रा. सुरत, गुजरात) यांचा समावेश आहे. तर विष्णू मनोजकुमार छकवाला (वय २८), बिपीन नवीनचंद्र राणा (वय ४९), सागर निपुण शहा (वय ३०), विक्रम महेंद्रभाई उसवाल (वय ४२, सर्व रा. सुरत, गुजरात) हे चौघे गंभीर जखमी झाल्याने त्यांना अधिक उपचारार्थ नाशिक येथील रुग्णालयात हलविण्यात आले.
नेमकं काय घडलं?
सुरतहून शिर्डीला श्री साईबाबा दर्शनासाठी भाविक फॉर्च्युनर वाहनाने (क्र. जीजे ०५, आरजे ८९०९) जात होते. मंगळवारी (दि. २८) मध्यरात्री दीड वाजेच्या सुमारास हा अपघात झाला. अपघातात वाहनाचा चक्काचूर झाला. चालकाचे वाहनांवरील नियंत्रण सुटल्याने वाहनाने दोन-तीन पलट्या घेऊन दुभाजकावर आदळले असावे, असा अंदाज व्यक्त केला जात आहे. याप्रकरणी तालुका पोलिसांत अपघाताचा गुन्हा दाखल करण्यात आला.
या प्रकरणी तालुका पोलिसांत नीरज अशोककुमार कापडिया (रा. जदाखाडी मैधरपुरा, सुरत) यांच्या फिर्यादीवरून चालक सागर निपुण शाह याच्याविरुद्ध भरधाव वेगाने वाहन चालवून मृत्यूस कारणीभूत ठरल्याचा गुन्हा दाखल करण्यात आला. अधिक तपास पोलिस निरीक्षक संदीप मंडलिक करीत आहेत.
बुलढाण्यात तरुणाचा मृत्यू
तर दुसरीकडे, म्हैस आडवी आल्याने दुचाकीला अपघात होऊन एका तरुणाचा जागीच मृत्यू झाला, तर त्याचा मित्र गंभीर जखमी झाला. ही दुर्दैवी घटना बुलढाणा जिल्ह्यातील मेहकर-डोणगाव मार्गावर खंडाळाजवळ सत्यजित कॉलेजसमोर मंगळवारी सकाळी ११ वाजता घडली. वाशीम जिल्ह्यातील वसारी येथील शिवम यादवराव जाधव आणि लोणी गवळी येथील गणेश कष्टे हे दोघे डोणगाव येथून एमएच २८ एडब्ल्यू २७४५ क्रमांकाच्या दुचाकीने मेहकरकडे जात होते. रस्त्यात अचानक म्हैस आडवी आल्याने दुचाकी अनियंत्रित होऊन हा अपघात झाला.