मुंबई महापालिकेच्या विलेपार्ले येथील कूपर रुग्णालयामध्ये उंदरांचा सुळसुळाट झाल्याने रुग्ण व नातेवाईकांमध्ये भीतीचे वातावरण असतानाच, येथे दाखल दोन ज्येष्ठ महिला रुग्णांचा उंदरांनी चावा घेतल्याचा धक्कादायक प्रकार उघडकीस आला आहे. या महिलांची प्रकृती स्थिर असली, तरी रुग्ण व नातेवाईकांनी तीव्र संपात व्यक्त केला आहे.
मरोळ, शिवाजीनगर येथे राहणाऱ्या इंदूमती कदम (८५) तसेच अन्य एका ८० वर्षीय महिला रुग्णाला उंदराने चावा घेतला. श्वास घेण्यास त्रास होत असल्याने इंदूमती यांना शनिवारी कूपर रुग्णालयामध्ये दाखल करण्यात आले. अतिदक्षता विभागामध्ये उपचार केल्यानंतर, प्रकृतीमध्ये सुधारणा झाल्याने त्यांना मंगळवारी महिलांच्या सर्वसाधारण रुग्णकक्षामध्ये हलविण्यात आले. येथे बुधवारी रात्री त्यांच्या उजव्या हाताला चार ठिकाणी उंदराने चावा घेतला. इंदूमती कदम यांना मधुमेह असल्यामुळे, त्यांच्या शरीरातील संवेदना कमी झाल्याने उंदराने चावा घेतल्याचे त्यांना जाणवले नाही.
इंदूमती यांचा नातू गुरुवारी सकाळी त्यांना बघण्यासाठी आल्यानंतर, ही बाब उघडकीस आली. त्याने परिचारिकांच्या निदर्शनास आणून दिले. डॉक्टर आल्यावर त्यांनी उपचार केल्याचे इंदूमती यांचे जावई संतोष जाधव यांनी सांगितले. शुक्रवारी सकाळी याचीच पुनरावृत्ती घडली. कूपर रुग्णालयात सोमवारी दाखल झालेल्या एका ८० वर्षीय महिलेचाही उंदराने चावा घेतला. या संदर्भात पोलिस ठाण्यात मेडिको-लीगल गुन्हा दाखल केला आहे.
इंदुमती कदम यांना मधुमेह असून उंदरांनी त्यांच्या हाडापर्यंतची त्वचा कुरतडून खाल्ली आहे. ही जखम बरी झाली नाही, तर त्यांना या वयात त्याचा त्रास सहन करावा लागेल. इतर कोणत्याही रुग्णाला त्रास होऊ नये, यासाठी तरी काळजी घेणार का,’ असा प्रश्न रुग्णांच्या कुटुंबीयांना केला आहे.