शहरात ‘स्पा’च्या आडून मोठ्या प्रमाणावर वेश्या व्यवसाय चालवणाऱ्या ‘धनराज’, ‘प्रिया’ आणि ‘अनुज’ या त्रिकुटावर महाराष्ट्र संघटित गुन्हेगारी (मकोका) कायद्यांतर्गत कारवाई करण्याचे खुले आव्हान पोलिस आयुक्तांनी वरिष्ठ अधिकाऱ्यांना दिले आहे. या तिघांवर मकोका कारवाईचा प्रस्ताव पाठवणाऱ्या पोलिस उपायुक्ताला आणि वरिष्ठ निरीक्षकाला थेट बक्षीस देण्याची घोषणा पोलिस आयुक्तांनी केली.
पोलिसांच्या रडारवर असलेले ‘धनराज, प्रिया आणि अनुज’ हे त्रिकुट सध्या शहरातील वेश्या व्यवसायात मुख्य सूत्रधार बनले आहे. शंभरहून अधिक स्पा सेंटर ते चालवत असून, प्रत्यक्षात मात्र त्यामध्ये वेश्याव्यवसाय सुरू असल्याचे उघड झाले आहे. या टोळीपर्यंत पोहोचण्यात पोलिस यंत्रणा अद्याप अपयशी ठरली आहे. केवळ व्यवस्थापकांवर कारवाई करून मुख्य गुन्हेगारांपर्यंत पोहोचण्यात अपयश आले आहे.
पोलिस सूत्रांच्या माहितीनुसार, संबंधित त्रिकुट नावापुरते स्पा चालवत असून, त्यांची सर्व सूत्रे ‘व्यवस्थापका’कडे सोपवली आहेत. हे व्यवस्थापक अनेकदा ‘बाहेरून आणलेले’ असतात, जे कारवाईत अडकतात, तर मुख्य सूत्रधार मोकाट राहतात. सर्वांत धक्कादायक बाब म्हणजे, अलीकडेच विमानतळ पोलिस ठाण्याच्या हद्दीत गुन्हे शाखेच्या कारवाईत एक अवघ्या 15 वर्षांची मुलगी वेश्याव्यवसायात अडकलेली आढळली. याबाबत ‘महाराष्ट्र टाइम्स’ने वृत्तमालिका प्रसिद्ध करून विषयाला वाचा फोडली होती.
फक्त निवडक कारवाया
सध्या केवळ फुटकळ कारवाया होत असून, मुख्य गुन्हेगारांना अटक होणे दूरच; त्यांच्या नावांवर थेट गुन्हेदेखील दाखल झालेले नाहीत. त्यामुळे पोलिसांची कारवाई निवडक आणि प्रभावहीन असल्याचा आरोप सामाजिक कार्यकर्ते व महिला संघटनांकडून केला जात आहे. पोलिस आयुक्तांनी मागील वर्षी सामाजिक सुरक्षा विभाग बरखास्त करून, विशेषतः वेश्याव्यवसायावर कारवाईसाठी ‘मानवी वाहतूक प्रतिबंधक विभाग’ सुरू केला. मात्र, अपेक्षेप्रमाणे ठोस कारवाई न झाल्याने अनेक स्पा पुन्हा जोमाने सुरू झाले आहेत.
खुलेआम जाहिरात
‘बॉडी स्पा’, ‘रिलॅक्सेशन सेंटर’, ‘थाई मसाज’ अशा नावांखाली सोशल मीडिया, मेसेजिंग अॅप, वेबसाइट्सवरून सर्रास जाहिरात केली जाते. यातून दररोज नवे ग्राहक खेचले जातात. मात्र, पोलिस यंत्रणांनी याकडे हेतुपुरस्सर दुर्लक्ष केले आहे का, असा प्रश्न उपस्थित होत आहे.
पोलिस आयुक्तांची स्पष्ट भूमिका
पोलिस आयुक्त अमितेशकुमार यांनी झालेल्या वरिष्ठ अधिकाऱ्यांच्या बैठकीत यावर कडक शब्दांत नाराजी व्यक्त केली. त्यांनी स्पष्ट केले, की या त्रिकुटावर ‘मकोका’ अंतर्गत कारवाई केली जाणे अत्यावश्यक आहे. कोणताही पोलिस उपायुक्त किंवा वरिष्ठ निरीक्षक है गुन्हेगारी जाळे उद्ध्वस्त करील, तर त्याला पोलिस दलातर्फे थेट बक्षीस दिले जाईल.