धावण्याचा सराव करताना हृदयविकाराचा तीव्र झटका आल्यामुळे सांगलीच्या लेफ्टनंटचा बिहारमध्ये मृत्यू झाल्याची दुर्दैवी घटना समोर आली आहे. वयाच्या अवघ्या 26 व्या वर्षी लेफ्टनंट अथर्व संभाजी कुंभार यांची प्राणज्योत मालवली. बिहारमधील गया येथे प्रशिक्षणावेळी धावण्याचा सराव करत असताना हृदयविकाराचा तीव्र झटका आल्यामुळे अथर्व कुंभार यांचे निधन झाले.
अथर्व कुंभार हे मूळ सांगलीचे होते. त्यांच्या पार्थिवावर मंगळवारी सकाळी आठ वाजता पलूस येथे अंत्यसंस्कार करण्यात आले. त्यांच्या अकस्मात निधनामुळे कुंभार कुटुंबासह नातेवाईक आणि मित्र परिवारावर दुःखाचा डोंगर कोसळला आहे. त्यांचे सहकारीही धक्क्यात असून परिसरावर शोककळा पसरली आहे.
लेफ्टनंट अथर्व कुंभार यांचे बिहारमधील गया येथील ऑफिसर ट्रेनिंग अकॅडमी (ओटीए) मध्ये प्रशिक्षण सुरू होते. प्रशिक्षणादरम्यान जवानांना उष्णतेचा त्रास होऊ नये म्हणून मध्यरात्री धावण्याचा सराव घेतला जातो. अथर्व कुंभार यांनी 19 किलोमीटरचे अंतर पूर्ण केले होते. उर्वरित 500 मीटर अंतर बाकी असताना त्यांना त्रास जाणवू लागला. हृदयविकाराचा तीव्र धक्का बसल्याने त्यांना तातडीने सैनिक वैद्यकीय रुग्णालयात दाखल करण्यात आले. मात्र उपचारादरम्यान त्यांनी अखेरचा श्वास घेतला.
अथर्व यांचे शालेय शिक्षण किर्लोस्करवाडी येथे झाले. तर महाविद्यालयीन शिक्षण आण्णासाहेब डांगे महाविद्यालयात पूर्ण केले होते. मेकॅनिकल इंजिनिअरिंगची पदवी घेतल्यानंतर अथर्व यांनी दोन वर्षे पुण्यात माहिती आणि तंत्रज्ञान क्षेत्रात नोकरी केली. स्टाफ सिलेक्शन कमिशनमधून त्यांची लेफ्टनंट पदासाठी निवड झाली होती.