नयन यादवाड, कोल्हापूर: कोल्हापूर जिल्ह्यात एक धक्कादायक घटना घडली आहे. विद्यादानासारख्या पवित्र कार्याला एका शिक्षकाने काळीमा फासला आहे. आपल्या वासनेच्या तृप्ततेसाठी अल्पवयीन मुलींसोबत अश्लील चाळे करणाऱ्या शिक्षकाला गावकऱ्यांनी चांगलाच बदडला आहे.
प्रकरण काय?
कागल तालुक्यातील मुरगुडमधील एका शाळेतील शिक्षकाने अल्पवयीन मुलीवर अत्याचार केला. आरोपी शिक्षकाचे नाव मुल्ला निसारअहमद मोहिददीन आहे. वारंवार होणाऱ्या त्रासाला कंटाळून पीडितेने पालकांना माहिती दिली. संतप्त पालकांनी शाळेत तक्रार करत शिक्षकाला मारहाण केली. याप्रकरणी पोलिसांनी गुन्हा दाखल केला असून, गावात प्रचंड तणावाचे वातावरण आहे.
अल्पवयीन विद्यार्थिनींना त्रास देत होता
मुरगुडमधील सेनापती कापशी येथील रानडे विद्यालयात हा प्रकार घडला. आरोपी शिक्षक मुल्ला निसारअहमद मोहिददीन याच शाळेत सहाय्यक शिक्षक म्हणून काम करतो. तो गेल्या काही महिन्यांपासून शाळेतील अल्पवयीन विद्यार्थिनींना त्रास देत होता.
शाळेच्या मैदानातच बेदम मारहाण
पीडित मुलीने घडलेला प्रकार पालकांना सांगितला. त्यामुळे संतप्त झालेल्या पालकांनी शाळेत जाऊन शिक्षणाधिकाऱ्यांकडे तक्रार केली. गावकऱ्यांना ही माहिती समजताच त्यांनी शाळेत धाव घेतली. त्यांनी आरोपी शिक्षकाला शाळेच्या मैदानातच बेदम मारहाण केली.
गाव बंदची हाक
पोलिसांनी घटनास्थळी दाखल होऊन आरोपी शिक्षकाला ताब्यात घेतले. मुरगुड पोलीस स्टेशनमध्ये त्याच्याविरुद्ध गुन्हा दाखल करण्यात आला आहे. गावकऱ्यांनी या घटनेच्या निषेधार्थ गाव बंदची हाक दिली आहे. त्यामुळे परिसरात तणाव निर्माण झाला आहे.
हसन मुश्रीफ यांचे पोलिसांना आदेश
“संबंधित शिक्षण संस्थेने तात्काळ कारवाई करत आरोपीला बडतर्फ केले,” असे प्रसिद्धीपत्रकात म्हटले आहे. “वैद्यकीय शिक्षण मंत्री हसन मुश्रीफ यांनी पोलिसांना आरोपीवर कठोर कारवाई करण्याचे आदेश दिले आहेत.”
गावकऱ्यांनी शांतता राखण्याचे प्रशासनाचे आवाहन
या घटनेमुळे परिसरात संतापाची लाट पसरली आहे. आरोपी शिक्षकाला कठोर शिक्षा देण्याची मागणी जोर धरू लागली आहे. पोलीस या प्रकरणाचा अधिक तपास करत आहेत. गावकऱ्यांनी शांतता राखण्याचे आवाहन प्रशासनाने केले आहे.