सायबरचोरांच्या टोळीने डोंबिवलीतील १३ जणांना ऑनलाइन फसवणुकीच्या जोळ्यात ओढत सुमारे १ कोटी २७ लाखांहून जास्त रुपये लुटण्याचा प्रकार उघडकीस आला आहे. या प्रकरणी मानपाडा पोलिस ठाण्यात दोन वेगवेगळे गुन्हे दाखल झाले आहेत. एका गुन्ह्यात शेअर ट्रेडिंगच्या नावाखाली पाच जणांना तर दुसऱ्या प्रकरणात ‘वर्क फॉर्म होम’ च्या नावाखाली आठ जणांना गंडा घालण्यात आला आहे.
डोंबिवली पूर्वेकडे राहणारे नोकरदार अमित (नाव बदलले आहे) यांना शेअर मार्केट संदर्भातील काही मेसेज आले होते. आर्थिक अडचण आणि मुलांच्या भवितव्याचा विचार करत त्यांनी या मेसेजला प्रतिसाद देत अधिक माहिती विचारली. जुजबी माहिती देत एका महिलेने त्यांना एका ग्रुपमध्ये सहभागी केले. या ग्रुपमध्ये ८५हून अधिक सदस्य होते. शेअर कसे विकत घ्यायचे, याविषयी ग्रुपमध्ये माहिती देण्यात येत होती. अमित यांना एक अॅप्लिकेशन डाऊनलोड करण्यास सांगून हे अॅप्लिकेशन चालू करण्यासाठी दहा हजार रुपये उकळले. नंतर, त्यांना आणखी पैशाची गुंतवणूक करण्यास सांगितले.
या गुंतवणुकीवर चांगला नफा मिळाल्याचे संबधित अॅपमध्ये दिसत होते. आणखी पैशाची गुंतवणूक केल्यास जास्त फायदा होईल, असे सांगितल्याने अमित यांनी ५५ लाख ८६ हजार भरले. या गुंतवणुकीवर २ कोटी ६९ हजार रुपये नफा मिळाल्याचे अॅपवर दाखवत होते. त्यांनी हे पैसे काढण्याचा प्रयत्न केला. परंतु, प्रतिसाद मिळाला नाही. उलट त्यांच्याकडे आणखी पैशाची मागणी करण्यात आली होती. फसवणूक झाल्याचे कळताच त्यांनी मानपाडा पोलिस ठाण्यात तक्रार केली. त्यांच्याप्रमाणे अन्य चार जणांची अशाच पद्धतीने फसवणूक झाल्याचे स्पष्ट झाले. या गुन्ह्यातील फसवणुकीचा आकडा सुमारे ९५ लाख ८४ हजार इतका आहे. या प्रकरणी मानपाडा पोलिस ठाण्यात गुन्हा दाखल करण्यात आला. याच पोलिस ठाण्यात रविवारीही ऑनलाइन फसवणुकीच्या एका गुन्ह्याची नोंद झाली.
टास्कचा डाव
डोंबिवलीतील २८ वर्षांच्या तरुणाला घरबसल्या कामाविषयी मेसेज आला. पैशाची गरज असल्याने त्याने या विचारणा केली, त्यावर एक लिंक देऊन टास्क पूर्ण करण्यास सांगितले. हा टास्क त्याने पूर्ण केल्यानंतर त्याच्या बँक खात्यात एक हजार रुपये जमा झाले. त्यानंतर पुढील टास्क पूर्ण करण्यासाठी दुसरी लिंक पाठवली. तसेच, टास्क पूर्ण करण्यासाठी दहा हजारांची गुंतवणूक करण्यास सांगितले. त्यानुसार तरुणाने २४ लाखांपेक्षा जास्त रक्कम पाठवले. त्या रकमेवर चांगला नफा मिळाल्याचे ऑनलाइन दाखवत होते. मात्र, ती रक्कम त्याला मिळाली नाही. त्याच्याप्रमाणे अन्य सात जणांना गंडा घातल्याचे स्पष्ट झाले आहे. या प्रकरणांत ३१ लाख ४६ हजारांच्या आसपास फसवणूक झाली आहे.