सुशील राऊत,छत्रपती संभाजीनगर: छत्रपती संभाजीनगरमध्ये एका २२ वर्षीय विद्यार्थ्याचा अपघातात मृत्यू झाला. सुमित प्रधान असे त्याचे नाव आहे. तो MBA चे शिक्षण घेत होता. धुळे-सोलापूर महामार्गावर पाचोड बायपासजवळ हा अपघात झाला. अज्ञात वाहनाने त्याच्या दुचाकीला धडक दिली. सुमितने हेल्मेट घातले असते, तर कदाचित त्याचा जीव वाचला असता, असे प्रत्यक्षदर्शींनी सांगितले. पाचोड पोलिसांनी या घटनेची नोंद अकस्मात मृत्यू म्हणून केली आहे.
सुमित प्रधान हा मूळचा माजलगाव, बीडचा रहिवासी होता. तो MBA चे शिक्षण घेण्यासाठी छत्रपती संभाजीनगरला येत होता. मिळालेल्या माहितीनुसार, सुमित माजलगावहून दुचाकीवरून छत्रपती संभाजीनगरकडे निघाला होता. पाचोडजवळ त्याच्या दुचाकीला मागून एका भरधाव वेगातील अज्ञात वाहनाने धडक दिली. या अपघातात तो गंभीर जखमी झाला आणि त्याचा मृत्यू झाला.
अपघाताच्या वेळी सुमितने हेल्मेट घेतले होते. पण त्याने ते डोक्यावर न घालता दुचाकीच्या हँडलला अडकवले होते. प्रत्यक्षदर्शींनी सांगितले की, “सुमितने हेल्मेट वापरले असते तर कदाचित त्याचा जीव वाचू शकला असता.” पाचोड पोलीस स्टेशनमध्ये या घटनेची नोंद ‘अकस्मित मृत्यू’ म्हणून करण्यात आली आहे. पोलीस पुढील तपास करत आहेत. या घटनेमुळे परिसरात हळहळ व्यक्त होत आहे.
दुसरीकडे, पाच मित्र धाब्यावरुन जेवण करून छत्रपती संभाजीनगरकडे परतत असताना भरधाव कार रस्त्यावरील पुलाच्या दुभाजकाला धडकल्याने अपघात झाला.या अपघातात ३ जण जागीच ठार झाले आहेत. तर दोन जण गंभीर जखमी आहेत. हा अपघात एवढा भीषण होता की चारचाकी वाहनाचा अक्षरशः चुराडा झाला आहे. ही घटना छत्रपती संभाजीनग र- जळगाव राष्ट्रीय महामार्ग बिल्डा फाट्याजवळ मंगळवारी, २४ जून रोजी रात्री बारा वाजेच्या सुमारास घडली. जखमींवर छत्रपती संभाजीनगरच्या घाटी रुग्णालयात उपचार सुरू आहेत. याप्रकरणी स्थानिकांनी दिलेल्या माहितीनुसार, छत्रपती संभाजीनगर शहरातील पाच जण फुलंब्री रस्त्यावरील ढाब्यावर एम.एच २० इ.जे.१५८६ या कारने जेवण करण्यासाठी गेले होते. जेवण झाल्यानंतर फुलंब्री येथून छत्रपती संभाजीनगरकडे छत्रपती संभाजीनगर – जळगाव राष्ट्रीय महामार्गावरुन ते येत होते.