येत्या काही महिन्यात राज्यभरात स्थानिक स्वराज्य संस्थांच्या निवडणुका होत आहेत. त्यामुळे राज्यभरात राजकीय वातावरण पेटल आहे. अनेक पक्षांमध्ये इनकमिंग सुरू आहे. याच पार्श्वभूमीवर पुण्यामध्ये एकनाथ शिंदे यांच्या शिवसेनेने पुणे महापालिकेसाठी मेगा प्लॅन आखला आहे. येथे काही दिवसातच शिंदेंच्या शिवसेनेमध्ये पुण्यातील शेकडो नेते आणि कार्यकर्त्यांचं इन्कमिंग होणार असल्याची माहिती आहे. यामध्ये महायुती व महाविकास आघाडीतील माजी नगरसेवक, तसेच गणेश मंडळ कार्यकर्ते आणि मागील महापालिकेची निवडणूक लढवलेले मात्र पराभूत झालेल्या उमेदवारांचा समावेश आहे.
हा जम्बो पक्षप्रवेश सोहळा रविवारी पार पडणार होता. मात्र, मावळ तालुक्यातील कुंडमळा येथे झालेल्या दुर्दैवी अपघातामुळे, तसेच केदारनाथ येथे झालेल्या हेलिकॉप्टर दुर्घटनेच्या पार्श्वभूमीवर, या कार्यक्रमाला स्थगिती देण्यात आली असल्याची माहिती आहे.
पुण्यामध्ये शिवसेनेची ताकद ही त्याआधी मर्यादित आहे. गेल्या दोन विधानसभा निवडणुकीमध्ये शिवसेना एकसंध असताना आणि शिवसेना फुटल्यानंतर देखील पुणे शहरातील आठ विधानसभा मतदारसंघांपैकी एकाही विधानसभा मतदारसंघात शिवसेनेने निवडणूक लढवली नाही. तर 2017 साली झालेल्या महापालिका निवडणुकीत सुद्धा एकसंध शिवसेनेला केवळ दहा नगरसेवकांपर्यंत मजल मारता आली होती. त्यामुळे पुणे शहरात शिवसेनेची ताकद ही मर्यादित असल्याचं स्पष्ट झालं होतं. त्यानंतर शिवसेनेच्या फुटी नंतर एकनाथ शिंदे यांच्यासोबत दहा पैकी केवळ एक नगरसेवक गेला. तर उरलेल्या नगरसेवकांनी उद्धव ठाकरे यांच्या सोबत राहणं पसंत केलं होतं. मात्र काही महिन्यांपूर्वी उद्धव ठाकरे यांच्या पक्षातील पाच नगरसेवकांनी भाजपमध्ये प्रवेश केला होता. त्यामुळे दोन्हीही शिवसेनेची ताकद पुण्यामध्ये ही आणखीनच घटल्याचं पाहायला मिळालं.
एकीकडे शिवसेनेची घटती ताकद पाहता एकनाथ शिंदे यांनी आता पुण्यावर विशेष लक्ष केंद्रित केला आहे. त्या पार्श्वभूमीवरच काँग्रेसचे माजी आमदार रवींद्र धंगेकर यांना त्यांनी पक्षात प्रवेश दिला. प्रवेश दिल्यानंतर एकनाथ शिंदे यांनी रवींद्र धंगेकर यांच्यावर पुणे महानगर प्रमुख म्हणून मोठी जबाबदारी दिली. ही जबाबदारी मिळताच धंगेकर महापालिका निवडणुकीच्या तयारीला लागले असून, त्यांच्या प्रयत्नातूनच हा मोठ्या प्रमाणात पक्षप्रवेश घडून येणार आहे, अशी माहिती आहे.
काही दिवसांपूर्वीच रवींद्र धंगेकर यांनी महाराष्ट्र टाइम्स ऑनलाइनशी बोलताना शिवसेना पुणे शहरात स्वबळावर निवडणूक लढवण्याची तयारी करत असल्याचं स्पष्ट केलं होतं. त्यासोबतच आम्ही तसं मत एकनाथ शिंदे यांच्यासमोर मांडल्याचे देखील सांगितलं होतं. आणि त्याच पार्श्वभूमीवर हे जम्बो प्रवेश शिवसेनेत होणार आहेत. मात्र या प्रवेशामध्ये पुणे शहरातील कोणते मोठे चेहरे हे सेनेच्या गळाला लागले आहेत याबद्दल शिवसेनेच्या नेत्यांनी मात्र कमालीची गुप्तता पाळली आहे. त्यामुळे सेनेतील ही मेगा भरती आता नक्की कधी होणार आणि कोणत्या पक्षाला याचा मोठा धक्का बसणार हे येत्या काळात स्पष्ट होईलच.