विवाह संकेतस्थळाच्या जुळवणाऱ्या माध्यमातून मुलासाठी वधूचा शोध घेणे ठाण्यातील एका ज्येष्ठ महिलेला चांगलेच महागात पडले आहे. महिलेच्या नावाने लग्नासाठी संपर्क साधणाऱ्या आरोपींनी ज्येष्ठ महिलेला बिटकॉईन, क्रिप्टोमध्ये पैशाची गुंतवणूक केल्यास चांगला परतावा देण्याचे प्रलोभन दाखवत त्यांची ६४ लाखांपेक्षा जास्त रुपयांची फसवणूक केली आहे. याप्रकरणी तिघांविरुद्ध नौपाडा पोलिस ठाण्यात गुन्हा दाखल झाला आहे.
ठाण्यात राहणाऱ्या ज्येष्ठ महिलेचे वय ६८ वर्षे असून विवाह संकेतस्थळाद्वारे त्या मुलाचे लग्न जुळावे, यासाठी प्रयत्न करत होत्या त्यांनी संकेतस्थळावर मुलाचा बायोडाटा अपलोड केला होता. अचानक ऐके दिवशी समाजमाध्यमाद्वारे त्यांना एका महिलेने संपर्क साधत लग्नासाठी वराच्या शोधात असून तुमच्या मुलाचा बायोडाटा आवडल्याचे सांगितले. ज्येष्ठ महिलेचा मुलगा काही कामानिमित्त बाहेर असल्याने त्यांनी मुलाला याविषयी कोणतीच कल्पना दिली नव्हती. भावी सूनेचा फोटो आणि तिने पाठवलेला बायोडाटा आवडल्याने ज्येष्ठ महिला तिच्याशी समाजमाध्यमाद्वारे संपर्कात होती. केवळ त्यांच्यात चॅटिंगद्वारेच संभाषण चालू होते. त्याचदरम्यान, लग्नासाठी संपर्क करणाऱ्या त्या महिलेने तिचा भाऊ मोठा व्यावसायिक असून त्याच्या व्यवसायात पैशाची गुंतवणूक केल्यास चांगला परतावा मिळेल, असे सांगितले.
तिच्या बोलण्यावर विश्वास ठेवत ज्येष्ठ महिलेने पैशाची गुंतवणूक करण्याचा निर्णय घेतला. नंतर त्यांना एका व्यक्तीचा फोन आला. त्याने आपण संबधित महिलेचा भाऊ असल्याचे सांगून गेल्या सात वर्षांपासून बिटकॉईन आणि क्रिप्टोमध्ये गुंतवणूकीचा व्यवसाय करत आहे. या व्यवसायातून भरपूर पैसे मिळत आहेत. गुंतवणुकीसाठी पैसे दिल्यास त्यावर चांगला मोबदला देण्याचे त्याने आश्वासन दिले. त्याच्या बोलण्यावर विश्वास ठेवत ज्येष्ठ महिलेने सुरुवातीला काही पैशाची गुंतवणूक केली. त्या रकमेवर त्यांना काही प्रमाणात परतावा मिळाला. परिणामी त्यांनी आणखी पैशाची गुंतवणूक केली. सुमारे ६४ लाखांपेक्षा जास्त रुपये गुंतवणूक करणाऱ्या ज्येष्ठ महिलेस ना मोबदला मिळाला, ना मुद्दल रक्कम. त्यांनी पैशाची मागणी केल्यानंतर आरोपींनी पैसे देण्यास टाळाटाळ केली.
कराच्या नावाखाली आरोपींचा त्यांच्याकडून आणखी पैसे उकळण्याचा डाव होता. आरबीआयच्या नावाने त्यांना काही मेसेजही पाठवले. या सर्व प्रकाराबाबत संशय आल्याने ज्येष्ठ महिलेने याविषयी मुलाला सांगितले. त्यावर मुलाने हा फसवणुकीचा प्रकार असल्याचे सांगितले. त्यानंतर महिलेने फसवणूकीची तक्रार केल्यानंतर नौपाडा पोलिसांनी गुन्हा दाखल करत तपास चालू केला आहे.