सोलापूर जिल्ह्यातील माढा तालुक्यात टेंभुर्णीजवळ दोन मोटरसायकलची समोरासमोर धडक झाली. या अपघातात तीन तरुणांचा दुर्दैवी मृत्यू झाला. हे तरुण लग्नपत्रिका वाटण्यासाठी आणि काही कामासाठी वेगवेगळ्या गावी निघाले होते. 8 जून रोजी सायंकाळी 6 वाजण्याच्या सुमारास टेंभुर्णी-अकलूज रोडवर माळेगाव पाटीजवळ ही घटना घडली. अपघातात प्रशांत कुंडलिक खडतरे (वय 22), ओंकार बाबासाहेब शिंदे (वय 18) आणि निखिल अनिल वंजारे (वय 20) या तिघांचा मृत्यू झाला, तर एक जण किरकोळ जखमी झाला आहे.
प्रशांत खडतरे आणि त्याचे मित्र बंटी जाधव (वय 22) आणि सुरज लोखंडे (वय 18) हे तिघे MH-45 AW 2649 या मोटरसायकलवरून सोलापूरला लग्नपत्रिका देण्यासाठी जात होते. तर ओंकार शिंदे आणि निखिल वंजारे हे MH-13 ER 2906 या मोटरसायकलवरून बार्शीहून शेवरे येथे काही कामासाठी आले होते. परत येत असताना त्यांच्या गाडीची दुसऱ्या गाडीला जोरदार धडक झाली.
अपघातामध्ये प्रशांत खडतरे यांचा जागीच मृत्यू झाला. ओंकार शिंदे यांचा रुग्णालयात उपचारादरम्यान मृत्यू झाला. निखिल वंजारे याला गंभीर जखमी अवस्थेत सोलापूरला हलवण्यात आले. तिथे उपचार चालू असताना त्याचाही मृत्यू झाला.
दुर्दैवाची गोष्ट म्हणजे 8 जून रोजी प्रशांत खडतरे याचा वाढदिवस होता. वाढदिवसाच्या दिवशीच त्याचा अपघाती मृत्यू झाला. प्रशांत अकलूजमध्ये पिण्याच्या पाण्याचा व्यवसाय करत होता. त्याच्या मृत्यूमुळे सोलापूरमध्ये हळहळ व्यक्त होत आहे.
पोलिसांनी दिलेल्या माहितीनुसार, “प्रशांत कुंडलिक खडतरे, दायवंत बंटी जाधव आणि सुरज अरुण लोखंडे हे तिघे मोटरसायकलवरून प्रशांतच्या भावाच्या लग्नपत्रिका देण्यासाठी सोलापूरला जात होते. तसेच, करकंब येथील ओंकार बाबासाहेब शिंदे आणि निखिल अनिल वंजारे हे दोघे मोटरसायकलवरून बार्शी येथून शेवरे येथे खाजगी कामानिमित्त गेले होते. यातील तिघांचा अपघाती मृत्यू झाला असून इतर दोघे जखमी आहेत.”
दरम्यान, या अपघातामुळे तीन तरुण कुटुंबांनी आपले आधार गमावले असून परिसरात शोककळा पसरली आहे.