आदिवासी विकास महामंडळामार्फत खरेदी करण्यात येत असलेले धान (भात) राइस मिलऐवजी सुरगाणामार्गे गुजरातमध्ये विक्री करून त्याचा अपहार होत असल्याचे महामंडळाच्या चौकशी अहवालात समोर आले. त्यामुळे महामंडळाच्या व्यवस्थापकीय संचालक तथा आदिवासी आयुक्त लीना बनसोड यांनी याप्रकरणी सिन्नर येथील मे. रेणुका राइस मिलचे मालक राहुल भागवत आणि वाहनमालक सौरभ राऊत यांच्यावर गुन्हा दाखल करण्याचे निर्देश दिले आहेत. यासह राइस मिलबरोबरचा करारनामा रद्द करून ठेकेदाराची बँक गॅरटीही जप्त करण्यासह त्याला काळ्या यादीत टाकण्याची प्रक्रिया सुरू केली आहे.
आदिवासींच्या विक्री केलेल्या धानावर प्रक्रिया करण्यासाठी आदिवासी विकास महामंडळाने सिन्नर येथील मे. रेणुका राइस मिलबरोबर करार केला आहे. मिलने खरेदी केंद्रांवरील धान भरडाइसाठी मिलमध्ये आणणे अपेक्षित होते. परंतु, मिलमध्ये न आणता त्याची गुजरातमध्ये विक्री होत असल्याचा प्रकार समोर आला होता.
सुरगाण्यातील काही सामाजिक कार्यकर्त्यांनी याबाबत संबंधित वाहनांचा पाठलाग करून हा प्रकार उघडकीस आणला होता. याबाबत ‘मटा’ने वृत्त प्रसिद्ध केले होते. महाराष्ट्रात अनुदान घेऊन आदिवासी विकास महामंडळाचा स्वस्त दरात खरेदी केलेला भात प्रक्रियेनंतर थेट गुजरातच्या काळ्याबाजारात बाजारात विक्रीला जात असल्याचा असल्याच्या प्रक्रियेची बनसोड यांनी गंभीर दखल घेत चौकशी समिती नियुक्त केली होती. समितीने सखोल चौकशी केल्यानंतर तक्रारीत तथ्य आढळून आले आहे.
लीना बनसोड यांनी भात भरडाई समन्वय समितीचे अध्यक्ष तथा जिल्हाधिकारी जलज शर्मा यांना पत्र लिहून संबंधित ठेकेदारावर गुन्हा दाखल करण्यात येत असल्याने त्याला काळ्या यादीत टाकण्याची कारवाई करावी, अशी मागणी केली आहे. संबंधित ठेकेदाराची बँक गॅंरटीही जप्त करण्याचे निर्देश देण्यात आले आहेत.