मुंबईतील दादर परिसरात एका उबर कॅब चालकाने आपल्या कारमध्ये एका अल्पवयीन मुलीचा विनयभंग केल्याची धक्कादायक घटना घडली आहे. या प्रकरणी अल्पवयीन मुलीच्या कुटुंबाने दाखल केलेल्या तक्रारीवरून दादर पोलिसांनी आरोपी उबर चालक श्रेयांश पांडे याला अटक केली आहे.
दादरपोलिसांनी दिलेल्या माहितीनुसार, अल्पवयीन पीडितेने घरी जाण्यासाठी उबरवर कार बुक केली होती. परंतु घरी सोडण्याऐवजी आरोपीने मुलीला एका निर्जन ठिकाणी नेऊन तिचा विनयभंग करण्याचा प्रयत्न केला. १४ वर्षीय अल्पवयीन मुलगी पवई परिसरात राहते. १४ मे रोजी ती प्रभादेवी येथील तिच्या शाळेत Summer Camp साठी गेली होती. तिने संध्याकाळी ४:३० वाजता घरी जाण्यासाठी ॲपवरून उबर कार बुक केली. गाडी आल्यानंतर ती त्यात बसली, परंतु आरोपी चालकाने तिला पवईच्या पत्त्यावर नेण्याऐवजी पूर्व द्रुतगती महामार्गाच्या दिशेला घेऊन गेला आणि तिथून तिला गोंधळात टाकण्यासाठी विविध अरुंद गल्ल्यांमध्ये घेऊन गेला. तो एका निर्जन ठिकाणी थांबला आणि गाडीत काही समस्या असल्याचे सांगून गाडीच्या फेऱ्या मारू लागला.
नंतर, तिच्या मोबाईल फोनबद्दल विचारपूस करण्याच्या बहाण्याने, आरोपीने अल्पवयीन मुलीला चुकीचा स्पर्श केला. तो तिला सिगारेट हवी आहे का असे विचारत राहिला आणि मोठ्या आवाजात गाडीत संगीत वाजवत होता. तो प्रवासात सतत तिच्याकडे पाहत होता, ज्यामुळे मुलीला खूप अस्वस्थ वाटत होते, असे पोलिस अधिकाऱ्याने पुढे सांगितले. अखेर मुलीने तिच्या वडिलांना फोन केला, त्यांनी तिला ड्रायव्हरला गाडी थांबवण्यास सांगण्यास सांगितले. परंतु त्याने नकार दिल्याचे पोलिसांनी सांगितले. त्यानंतर मुलीचे वडिल ड्रायव्हरशी त्यांच्या मुलीच्या फोनवरुन बोलले. ड्रायव्हरने त्यांना सांगितले की तो मुलीला तिच्या घराजवळ सोडेल. तथापि, त्याने तिला तिच्या घरापासून थोडे दूर सोडले आणि पळून गेला, असेही पोलिस अधिकाऱ्याने सांगितले.
घरी आल्यानंतर अल्पवयीन मुलीने तिच्या वडिलांना संपूर्ण घटना सांगितली. त्यानंतर तिच्या वडिलांनी दादर पोलिसांकडे तक्रार दाखल केली. पोलिसांनी बीएनएस आणि पॉक्सो कायद्यांतर्गत गुन्हा दाखल करून आरोपीला अटक केली. याप्रकरणी अधिक तपास सुरू आहे. उबर कॅबच्या प्रतिनिधीशी संपर्क साधला असता त्यांनी याबद्दल काही माहित नसल्याचे सांगितले.