पिंपरी चिंचवडमधून धक्कादायक घटना समोर आली आहे. पिंपरी चिंचवड शहरातील वाल्हेकरवाडी परिसरात एका 18 वर्षीय तरुणीची धारदार शस्त्राने वार करून हत्या करण्यात आली. कोमल भरत जाधव असे मृत तरुणीचे नाव असून तिच्या हत्येचे कारण अद्याप समोर आलेले नाही. हत्येच्या घटनेचे सीसीटीव्ही फुटेज समोर आले असून याप्रकरणी पोलिसांनी अज्ञात व्यक्तींविरोधात गुन्हा दाखल केला आहे. रविवारी रात्री 9.30 वाजताच्या सुमारास ही घटना घडली आहे.
याबाबत पोलिसांकडून मिळालेली प्राथमिक माहिती अशी की, रविवारी रात्री 9.30 वाजताच्या सुमारास अज्ञात हल्लेखोर वाल्हेकरवाडी परिसरातील कृष्णाईनगर भागात हेल्मेट घालून वावरत होते. त्यांनी दुचाकीवरून येऊन भररस्त्यात कोमलवर धारदार शस्त्राने वार करून तिची निर्घृण हत्या केली. हत्येनंतर हल्लेखोर घटनास्थळावरून फरार झाले आहेत.
घटनेची माहिती मिळताच पोलिसांनी घटनास्थळी धाव घेत पंचनामा केला. त्यानंतर या परिसरात असलेल्या सीसीटीव्ही फुटेजची पोलिसांनी तपासणी केली. त्यात हल्लेखोर दिसत असून पोलिसांनी त्यांचा शोध सुरू केला आहे.
दरम्यान, भररस्त्यात घडलेल्या या घटनेमुळे वाल्हेकरवाडी परिसरात भीतीचे वातावरण पसरले आहे. रात्रीच्या वेळी भर चौकात अशा प्रकारे तरुणीची हत्या झाल्याने शहरातील कायदा-सुव्यवस्थेच्या दृष्टीने गंभीर प्रश्न उपस्थित झाले आहेत. पोलिसांकडून आरोपींचा शोध घेण्यासाठी विशेष पथके स्थापन करण्यात आली आहेत. स्थानिक नागरिकांनीही या घटनेचा तीव्र निषेध व्यक्त केला आहे. पोलिसांनी लवकरात लवकर आरोपींना बेड्या ठोकाव्यात, अशी मागणी स्थानिक नागरिकांनी केली आहे.